ԿԸՀ-ն ժխտում է. ՀԱԿ մեծամասնական թեկնածուն բողոք չի ներկայացրել

Կենտրոնան ընտրական հանձնաժողովը հաղորդագրություն է տարածել «ժողովուրդ» օրաթերթում տպագրված «Օրենք է խախտում»
հոդվածի կապակցությամբ։

«Հոդվածում նշված է, որ թիվ 17 ընտրատարածքում մեծամասնական ընտրակարգով առաջադրված ՀԱԿ անդամ Գագիկ Ներսիսյանի լիազոր ներկայացուցիչները բողոք են ներկայացրել ընտրատարածքային ընտրական հանձնաժողով այն մասին, որ «ՀՀԿ-ական թեկնածու Կարինե Պողոսյանն Արտաշատ քաղաքի ողջ շենքերի վրա, սննդամթերքների օբյեկտներին անթիվ-անհամար ընտրական պաստառներ է փակցրել…»:

Տեղեկացնում ենք, որ հոդվածում նշված տեղեկատվությունը չի համապատասխանում իրականությանը, և 21.04.2012 թվականի դրությամբ թիվ 17 ընտրատարածքային ընտրական հանձնաժողով վերոհիշյալ բովանդակությամբ որևէ դիմում (բողոք) չի ներկայացվել:

Հոդվածում նշված փաստերի հավաստիության ստուգման նպատակով 21.04.2012թ. թիվ 17 ընտրատարածքային ընտրական հանձնաժողովի անդամները շրջայց են կազմակերպել, որի արդյունքում պարզվել է, որ արգելված վայրերում պաստառներ փակցնելու վերաբերյալ տեղեկությունները հնարածին են և չեն համապատասխանում իրականությանը»,- ասված է հաղորդագրությունում։