Ծաղկաձորում բացվեց Ալեքսեյ Հեքիմյանի կիսանդրին

Ապրիլի 21-ին Ծաղկաձոր քաղաքում սիրո, գնահատանքի և մեծարման տոն էր:

Ոստիկանության պետ, գեներալ-լեյտենանտ Վլադիմիր Գասպարյանի նախաձեռնությամբ տեղի ունեցավ հայ մեծանուն երգահան, բազմաթիվ սիրված երգերի հեղինակ, ԽՍՀՄ արվեստի վաստակավոր գործիչ, խորհրդային միլիցիայի գեներալ-մայոր Ալեքսեյ Հեքիմյանի կիսանդրու բացման հանդիսավոր արարողությունը:

Միջոցառմանը ներկա էին ՀՀ ոստիկանության պետ, գեներալ-լեյտենանտ Վլադիմիր Գասպարյանը, Կոտայքի մարզպետ Կովալենկո Շահգալդյանը, Ծաղկաձորի քաղաքապետ Գարուն Միրզոյանը, ոստիկանության բարձրաստիճան սպաներ, կիսանդրու համահեղինակներ' հայր և որդի Յուրի և Դավիթ Մինասյանները, կոմպոզիտոր Երվանդ Երզնկյանը, ինչպես և մեծ երգահանի որդին՝ Միքայել Հեքիմյանը:

Ողջույնի խոսքով հանդես եկավ Ծաղկաձորի քաղաքապետ Գարուն Միրզոյանը:

Ոստիկանության պետն իր ելույթում անդրադարձավ մեծ հայի և հայ երգի անզուգական վարպետի անցած ուղուն, նրա թողած ժառանգությանն ու կատարած գործի կարևորությանը մեր և գալիք սերունդների կյանքում:

«Կոմպոզիտորների մեջ գեներալ և գեներալների մեջ կոմպոզիտոր»,- այսպես էին կոչում Ալեքսեյ Հեքիմյանին:
Իր հիշողություններով կիսվեց մեծ երգահանի ընկեր և բարեկամ Երվանդ Երզնկյանը:

Քանդակագործ Դավիթ Մինասյանը շնորհակալություն հայտնեց նախաձեռնության և նման պատասխանատու գործն իրեն վստահելու համար:
Հանդիսավոր բացման արարողությունը վստահվեց Ալեքսեյ Հեքիմյանի որդուն՝ Միքայել Հեքիմյանին և քանդակագործ Դավիթ Մինասյանին:
Հյուրերն ու ներկաները թարմ ծաղիկներ դրեցին մեծ եգահանի նորաբաց կիսանդրուն, ինչպես և հուշի եղևնի տնկեցին կիսանդրու մոտ:
Արարողությունից հետո մասնակիցներն ունկնդրեցին Ալեքսեյ Հեքիմյանի հեղինակած երգերը: