«Վերնատուն». բացառիկ ցուցահանդես Հայաստանի ազգային պատկերասրահում

Հայ գրատպության 500-ամյակին և ՅՈՒՆԵՍԿՕ-ի կողմից Երևանը' 2012 թ. գրքի համաշխարհային մայրաքաղաքի հռչակմանը նվիրված' ս. թ. ապրիլի 21-ին' ժամը 13:00-ին, Հայաստանի ազգային պատկերասրահում կբացվի «Վերնատուն» խորագրով ցուցահանդեսը, որտեղ, որպես կենտրոնական էքսպոնատ, կներկայացվի հատուկ այս ցուցադրության համար Մոսկվայի Տրետյակովյան պատկերասրահից բերված ԽՍՀՄ ժողովրդական նկարիչ, ԽՍՀՄ գեղարվեստի ակադեմիայի իսկական անդամ, Պետական մրցանակների դափնեկիր Դմիտրի Նալբանդյանի (1906-1993) հանրահայտ «Վերնատուն» անվանումով մեծադիր կտավը: Վարպետն այս գործը ստեղծել է 1974-1976 թթ. և 1978-ին արժանացել ԽՍՀՄ գեղարվեստի ակադեմիայի ոսկե մեդալի:

Թումանյանական «Վերնատունը», որպես գրական-մշակութային և ազգային մտածողության ձևավորման առանցքային կենտրոն, չափազանց մեծ ու կարևոր դերակատարում է ունեցել հայ իրականության համար և Դմիտրի Նալբանդյանի համանուն ստեղծագործությունը, դառնալով այս ցուցադրության առանցքը' իր շուրջն է համախմբել ազգի մտավորական գործիչների դիմանկարները: Նրանցից յուրաքանչյուրը' Հովհ. Թումանյան, Ղ. Աղայան, Կոմիտաս, Ա. Սպենդիարյան, Դ. Դեմիրճյան, Ավ. Իսահակյան, Վ. Սուրենյանց, Ե. Թադևոսյան, Մ. Սարյան... ազգային մշակույթի կարկառուն դեմք է, ազգային ինքնագիտակցության հիմք, դարակազմիկ մի էջ:

Հայաստանի ազգային պատկերասրահում բացվող այս ցուցահանդեսին ներկայացված են «Վերնատան» հետ անմիջական և աղերսներով կապված գործիչների դիմանկարները' գեղանկար, գծանկար ստեղծագործություններ, ինչպես նաև փորագրություն և քանդակ: Ցուցանմուշներն ընտրված են Հայաստանի ազգային պատկերասրահի և Ե. Չարենցի անվ. գրականության և արվեստի թանգարանի հավաքածուներից: Կներկայացվեն վրձնի հանճարեղ վարպետներ Եղիշե Թադևոսյանի, Մ. Սարյանի, Հմայակ Արծաթբանյանի և այլոց գործերը:

Այս բացառիկ ցուցահանդեսը, որտեղ կներկայացվի նաև Մեսրոպ Մաշտոցի կերպարը, պատմամշակութային շեշտադրումի գեղարվեստական փորձ է Հայոց գրերի գյուտից մինչև «Վերնատուն», մինչև հաջորդող ժամանակներ:
Ցուցահանդեսին կներկայացվեն նաև գրողների արխիվային ավելի քան 3 տասնյակ լուսանկարներ' փաստավավերագրական շունչ հաղորդելով և ամփոփելով ցուցադրությունը:

Ցուցահանդեսի բացմանը ներկա կգտնվեն և խոսքով հանդես կգան ՀՀ մշակույթի նախարար Հասմիկ Պողոսյանը, ՀՀ-ում ՌԴ դեսպանության ներկայացուցիչ Վալերի Կրիվոպուսկովը: Բացմանը կմասնակցեն նաև ԱՊՀ մշակութային համագործակցության խորհրդի անդամներ, ԱՊՀ նկարիչների միության կոնֆեդերացիայի անդամներ, Հայաստանի գրողների և նկարիչների միությունների պատասխանատուներ:

Ցուցահանդեսը կգործի ս. թ. ապրիլի 23-ից սեպտեմբերի 23-ը: