Հայոց Կաթողիկոսի այցը Վրաստան հակահայկական նոր ալիք է ստեղծել

Ինչպես գիտենք, այս տարվա հունիսին Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը միջեկեղեցական և հովվապետական վեցօրյա այցով մեկնեց Վրաստան` Վրաց Ուղղափառ եկեղեցու Իլիա Բ Կաթողիկոս-Պատրիարքի և Վիրահայոց թեմի թեմական խորհրդի հրավերով։ Այդ վեց օրերի ընթացքում քնննարկված հարցերը, թերևս, պտուղ չտվեցին։ Քաղաքագետնրի կարծիքով՝ Հայոց Կաթողիկոսի այցն ավելի խանգարեց, քան օգնեց վիրահայերին ու ջավախահայերին։

Այդ մասին այսօր «Հենարան» մամուլի ակումբում քաղաքագետ Սերգեյ Մինասյանն ասաց. «Մենք տեսանք, որ Հայոց Պատրիարքի այցելությունը հակահայկական նոր ալիք բարձրացրեց Վրաստանում։ Եկեղեցին Վրաստանում ունի մեծագույն որոոշիչ դեր։ Այն, ինչ որոշում է եկեղեցին, հեշտությամբ ընդունվում է իշխանությունների կողմից։ Ուստի հայ–վրացական խնդիրները բարձրաձայնելուց առաջ մենք պետք է նախ քննարկենք, թե այդ արձագանքն ինչպե՞ս կանդրադառնա վիրահայերի ու ջավախահայերի վրա»։

Հիշեցնենք, որ Վրաստանում ամենամեծ համայնքը հայկականն է, ուստի, ելնելով պատմական ու քաղաքական նկատառումներից՝ հունիսին կատարած իր այցով կաթողիկոսը խնդրել էր իրավական հիմք տալ հայկական եկեղեցուն, սակայն դրան հետևել էր վրաց պատրիարքի պատասխանը, թե նույնը ցանկանում են տեսնել Հայաստանում։ Ինչ խոսք, Հայաստանում վրացական համայնքը միայն մի քանի ընտանիքով է սահմանափակվում։

Ցավալի է, բայց փաստ, որ այսօր Հայաստանում եկեղեցուն հարկերից ազատելու փաստն արժանանում է դժգոհությունների։ Իսկ վրացական իշխանությունները ոչ միայն տարեկան 25.000 լարի են հատկացնում եկեղեցուն, այլև եկեղեցու կարծիքի ու որոշումների հետ հաշվի են նստում։