Երկրի անկախությունը դեռևս մարդու ազատությունը չի ապահովում. ԱԺ ՀՅԴ խմբակցության պատգամավոր

ԱԺ ՀՅԴ խմբակցության պատգամավոր Արտյուշ Շահբազյանը երեկ Հայկական երկրորդ հեռուստաալիքով հեռարձակվող «Խոսքի իրավունք» հաղորդման ժամանակ, վերլուծելով կուսակցության կարգախոսը, նշեց, որ ազատությունը պետք է լայն իմաստով հասկանալ. «Եթե մենք այդպես շատ պարզեցնենք խնդիրը, կարող ենք ասել, որ Հայաստանն ազատ չի: Երկրի անկախությունը դեռևս մարդու ազատությունը չի ապահովում: Չի կարող քաղաքացին ազատ կոչվել, եթե նա հավասար չէ բոլորին: Եթե բախվում են իրար հետ պաշտոնյայի զավակը կամ պաշտոնյան, օլիգարխը և պարզ քաղաքացին, պարզ քաղաքացին կարո՞ղ է երաշխավորված լինել, որ ինքը կհաղթի, եթե ինքը ճշմարիտ է: Պետք է հասնենք հավասարությանը, հայ մարդիկ պետք է լինեն հավասար, մենք մի ժողովուրդ ենք, որի մտավորականությունը, հերոսը պարզ գյուղից, պարզ հյուղակից է դուրս եկել: Եթե չկա ներքին ազատությունը, հասարակությունը չի կարող լինել ամբողջական և այդպիսի հասարակությունը մեծ խնդիրներ չի կարող լուծել: Մարդկանց հսկայական զանգվածը, որ հեռանում է, մեր արյունն է, մեր ուժն է քամվում: Այստեղ ապրող հասարակության մի հսկայական զանգված կրավորական, քաղաքացիական դիրքորոշման մեջ է, վախեցած է, արդարությանը չի հավատում»: 

Խոսելով մայիսի 6-ի ակնկալիքներից և թե ինչպիսի պատկեր կլինի մայիսի 7-ին` Արտյուշ Շահբազյանն ասաց, որ, իրենց կարծիքով, եթե առավելագույնս ապահովվեն ընտրությունների արդարությունը` Դաշնակցությունը բավականին լավ արդյունք կունենա: