Երևան 2012՝ գրքի համաշխարհային մայրաքաղաք

Հայաստանի Հանրապետության նախագահ Սերժ Սարգսյանի մասնակցությամբ «Երևան 2012 գրքի համաշխարհային մայրաքաղաք» ծրագրի բացման առիթով Երևանի քաղաքապետ Տարոն Մարգարյանի կողմից կազմակերպված պաշտոնական ընդունելությունից հետո, Հանրապետության ղեկավարը և պաշտոնական պատվիրակությունների ներկայացուցիչները քաղաքապետի ուղեկցությամբ շրջել են տոնական Երևանի կենտրոնական հատվածներով ու հետևել կազմակերպված միջոցառումներին:

Երևանի քաղաքապետարանից մինչև Հանրապետության հրապարակ տանող հատվածում, մասնավորապես, Մյասնիկյանի արձանին հարակից այգում Հայաստանում ապրող ազգային փոքրամասնությունների ներկայացուցիչները կազմակերպել էին իրենց մայրենիներով հրատարակված գրականության ցուցահանդես-վաճառք, իսկ Շահումյանի անվան հրապարակում Հ. Պարոնյանի անվան երաժշտական կոմեդիայի թատրոնը բեմադրել էր հատվածներ «Չարենց» և «Ալեք» ներկայացումներից:

Իսկ մայրաքաղաքի հանրակրթական դպրոցների շուրջ 6500 աշակերտներ ու ստեղծագործող պատանի նկարիչներ Հանրապետության հրապարակում «ԱմրաԳՐԻ՛Ր ապագադ» խորագրով կավճանկարի և գեղանկարի միջոցով արտահայտել են օրվա խորհրդի նկատմամբ իրենց վերաբերմունքը:

Հանրապետության նախագահն ու Երևանի քաղաքապետը գնահատել են երեխաների աշխատանքները, ոգևորել և խրախուսել են նրանց: