Ճապոնիան արգելել է F–15-երի թռիչքը

Ճապոնիայի իշխանություններն արգելեցին F – 15 կործանիչների թռիչքները, բացառությամբ շտապ տագնապի ժամանակ, այս կործանիչներից մեկի վառելիքային բաքի հետ կապված  ուրբաթ օրը տեղի ունեցած միջադեպից հետո, հաղորդում է Բի-Բի-Սի-ն:

Նախօրեին ճապոնական ինքնապաշտպանական ուժերի F – 15 կործանիչների փորձնական թռիչքի ժամանակ անջատվել էր կործանիչի վառելիքի բաքն ու հրթիռի մակետը : Բաքն ընկել էր Իսիկավայի շրջանի բնակելի տարածքներից ոչ շատ հեռու:

Պոկված բաքի մեջ վառելիք չէր եղել և միջադեպի արդյունքում ոչ ոք չէր վնասվել: Օդաչուն բարեհաջող վայրէջք է կատարել օդանավակայանում: Այնուամենայնիվ, Ճապոնիայի զինվորական ղեկավարությունն արգելել է այդ կործանիչների թռիչքներն այնքան ժամանակ, քանի դեռ պաշտոնապես չի հաստատվել, որ այդ կործանիչները բոլոր չափանիշներով համապատասխանում են անվտանգության կանոններին:

- Մենք տեղի ունեցածին շատ լուրջ ենք վերաբերվում,- հայտարարել է Ճապոնիայի ռազմա-օդային ուժերի գեներալ Շիգերու Իվասակին՝ ավելացնելով, որ միջադեպի պատճառները պարզելու համար հետաքննություն է սկսվել:

Այս տարվա մեջ սա արդեն երկրորդ դեպքն է, երբ Ճապոնիայի ռազմա–օդային ուժերի ղեկավարներն արգելում են F – 15  կործանիչների թռիչքները: Հուլիսին զինվորական ղեկավարությունը նույն քայլին դիմեց, երբ այս տիպի կործանիչը վթարվելով Արևելաչինական ծովն ընկավ: Այդ դեպքից հետո օդաչուն, ով վարում էր կործանիչը, մինչ այսօր համարվում է անհետ կորած:  

ճապոնիայի Զինված Ուժերում հաշվվում է 202 F- 15 կործանիչներ: Այս զինատեսակը Ճապոնիա սկսեց ներմուծվել ԱՄՆ-ից 1980 – ականների սկզբից: 

Ներկայումս ճապոնիայի կառավարությունը  մտադիր է թարմացնելու արդեն հնացող կործանիչների զինանոցը: Տոկիոն ճապոնիա նոր կործանիչներ ներմուծելու տենդեր է հայտարարել: Տենդերում ամենայն հավանականությամբ հաղթողներից մեկը կլինի Մեծ Բրիտանիայի, Իտալիայի, Իսպանիայի և Գերմանիայի համատեղ արտադրության Eurofighter Typhoon մոդելը:

Սպասվում է, որ նոր կործանիչների ներմուծման պայմանագիրը՝ 8 միլիարդ դոլարի չափով, կկնքվի մինչև տարեվերջ: