«Բորատ» ֆիլմի ցուցադրության շնորհիվ Ղազախստան այցելել ցանկացողների թիվն աճել է 10 անգամ

2006 թվականին նկարահանված «Բորատ» կինոֆիլմը նպաստել է Ղազախստանում զբոսաշրջության աճին: Tengrinews-ի փոխանցմամբ` այս մասին է հայտնել երկրի ԱԳՆ ղեկավար Երժան Կազիխանովը: «Այդ ֆիլմի ցուցադրման շրջանից սկսած Ղազախստան այցելել ցանկացողների թիվն աճել է 10 անգամ: Եվ ես նշել եմ, որ դա մեզ համար մեծ հաղթանակ է»,- հայտարարել է Կազիխանովը: Նրա խոսքերով` ամերիկյան զբոսաշրջային գործակալություններից մեկը նույնիսկ հատուկ «Բորատ-տուր» է կազմակերպել դեպի Ղազախստան: «Բորատ. Ամերիկայի մշակության հետազոտություններ` ի բարօրություն Ղազախստանի ժողովրդի» ֆիլմը ներկայացնում է հորինված կերպարի` լրագրող Բորատ Սագդիևի արկածների մասին, որին ֆիլմում մարմնավորել է հայտնի բրիտանացի կատակերգակ Սաշա Բարոն Կոենը:

Ֆիլմը, որում շատ են հանդիպում կոպիտ կատակները ղազախների և մի շարք այլ ազգերի ներկայացուցիչների վերաբերյալ, սկզբանական շրջանում լուրջ դժգոհություններ էր առաջացրել Ղազախստանում: Սակայն տեսնելով ֆիլմի հետևանքով երկրի ճանաչելիության տեմպերի զգալի աճը` ղազախական իշխանությունները սկսեցին հումորով վերաբերվել կինոնկարին:

Սկանդալային ֆիլմը վերջերս կրկին հայտնվել էր հասարակության ուշադրության կենտրոնում` Քուվեյթում անցկացված հրաձգության աշխարհի առաջնության ժամանակ տեղի ունեցած միջադեպի պատճառով, երբ Ղազախստանի օրհներգի փոխարեն սխալմամբ միացրել են «Բորատ» ֆիլմում հնչած «կեղծ օրհներգը», որում ներկայացվում է «աշխարհի մեծագույն պետության», «աշխարհի լավագույն արդյունաբերության» և «մաքրագույն մարմնավաճառների» մասին: