ԵԽԽՎ նախագահը մտադիր է հանդիպել Ադրբեջանի և Հայաստանի պատվիրակությունների ղեկավարների հետ

Այսօր՝ ԵԽԽՎ գարնանային նստաշրջանի առաջին օրը, կառույցի նախագահ Ժան-Կլոդ Մինյոնը մամլո ասուլիս է տվել։

Անդրադառնալով ԼՂ հարցով ենթահանձնաժողովի հետագա գործունեությանը՝ ԵԽԽՎ նախագահը նշել է, որ բյուրոն դեռ որոշում չի ընդունել այդ հարցի վերաբերյալ։ «Այդ հարցում դեռ որևէ առաջընթաց չկա։ ԵԽԽՎ բյուրոն պետք է քննարկումներ անցկացնի այդ հարցի շուրջ։ Կարող եմ միայն ասել, որ մտադիր եմ հանդիպել ԵԽԽՎ-ում Ադրբեջանի և Հայաստանի պատվիրակությունների ղեկավարների հետ։ Սա իմ նախաձեռնությունն է։ Այդ հանդիպումների ընթացքում մենք կքննարկենք ենթահանձնաժողովի հետագա ճակատագիրը»։

Քանի որ Հայաստանում անցկացվելիք առաջիկա խորհրդարանական ընտրությունների պատճառով հայկական պատվիրակությունը չի մասնակցում ԵԽԽՎ գարնանային նստաշրջանին, Ժան-Կլոդ Մինյոնն ընդգծել է, որ պատվիրակությունների ղեկավարների հետ նա անպայման հանդիպելու է կառույցի հունիսյան նստաշրջանին։

Բացի այդ ԵԽԽՎ նախագահը նշել է, որ մտադիր է մոտ ժամանակներում հանդիպել ԵԱՀԿ Մինսկի խմբի որոշ դիվանագետների, մասնավորապես՝ ֆրանսիացի համանախագահի հետ։

«Հանդիպումների ընթացքում մենք կքննարկենք Լեռնային Ղարաբաղի հակամարտության կարգավորման գործընթացում ստեղծված իրավիճակը», – ասել է Մինյոնը։