Րաֆֆի Հովհաննիսյանը՝ ՏԸՀ–ներում «Ժառանգության» տեղերի մասին. հարցազրույց

«Ժառանգություն» կուսակցության առաջնորդ Րաֆֆի Հովհաննիսյանը նախօրեին լրագրողների հետ հանդիպմանը նշեց, որ տեխնիկական վրիպակի պատճառով ԿԸՀ իրենց ներկայացրած ցուցակում մի քան տասնյակ տեղեր բաց կմնան, այսինքն՝ մի քանի տասնյակ Տեղամասային ընտրական հանձաժովում «Ժառանգությունը» չի ունենա իր լիցենզավորված անձինք։ Լուրեր.com–ի թղթակիցը փորձեց վերջինիցս ճշտել, թե երբ են կուսակցությունում իմացել, որ ցուցակներում վրիպակ է տեղի ունեցել.

Այդ հարցը պետք է շտաբի պետին ներկայացնեք։ Մեր շտաբի պետը՝ Խաչատուր Քոքոբլյանը,  ավելի կոնկրետ կարող է օրով, ժամով ներկայացնել։

Բայց մի քանի օր է արդեն, ինչ քննարկվում է, թե դուք վաճառել եք հանձնաժողովում ձեր տեղերը ՀՀԿ–ին։ Այդ մի քանի օրվա ընթացքում, մանավանդ եթե հաշվի առնեք, որ ձեր կուսակցությունում կա հայտնի փաստաբան, դուք չե՞ք պարզել՝ հնարավո՞ր է օրենքի շրջանակներում դիմել, որ վրիպակը շտկվի։ 

Ես սիրում եմ պատասխան տալ հարցի լիարժեք գիտությամբ։ Մանրամասները շտաբի պատասխանատուները կարող են տալ։ Եթե օրենքի սահմաններում կարելի է վրիպակը ուղղել, այդ քայլերը կատարվում են։ Բայց պետք է գրանցենք այդ իրականությունը, որ այդ վրիպակի բերմամբ որոշ տեղերում մենք բացեր ունեցել ենք և մենք ձեզ տեղյակ կպահենք, թե հստակ որտեղ։ Եթե ուղղման ենթակա են, ես վստահ եմ, որ դա կլինի։ Ուղղակի ներկա դրությամբ ես ավելի շատ մարզային, դաշտային առաքելության մեջ եմ։ Պարոն Քոքոբելյանը ավելի ճշգրիտ կպատասխանի հարցին։

Ըստ Ընտրական օրենսգրքի, եթե համապատասխան կուսակցության կամ քաղաքական ուժի կողմից իր քվոտայով լիցեզավորված անձ չի նշանակվում, ապա ՏԸՀ–ում կուսակցության քվոտայով նշանակում իրականացնելու լիազորությունն անցնում է Ընտրատարածքային ընտրական հանձնաժողովին։ Իսկ մեր ԸԸՀ նախագահները, ինչպես գիտեք, մեծ մասամբ ՀՀԿ անդամ են։ Մտավախություն չունե՞ք, որ ձեր քվոտայով կարող են նշանակվել Հանրապետական կուսակցության անդամներ։ 

Իհարկե, այդ մտավախությունը կա, բայց նրանք, ովքեր իրենց մանր պատվերները իրացնելու համար «վաճառք»,«վաճառել» բառերն են օգտագործում, հենց իրենք են, որ իրենց հետագծով վաճառքի հոգեբանությամբ են առաջնորդվում։ Այս դեպքում, իհարկե, մտահոգություն է, որ տեխնիկական վրիպակի բերմամբ լինում է ուրիշի կողմից մեր տեղի նշանակումը, դա մեզ մտահոգում է։ Մենք մեր սխալը բարձրաձայնում ենք, բայց նա, ով սխալը վաճառք է ենթադրում, ինքը, միգուցե, իր որոշումները վաճառքի տրամաբանությամբ է կայացնում, դրա համար է ասում։ Ես ուղղակի հերքում եմ, մերժում եմ և չեմ ընդունում անգամ դրա տողատակը։ Եվ ցավում եմ, որ անգամ ձեր հարցուփորձի մեջ, շատ հստակ պատասխան ստանալուց հետո, այդ հարցապնդումը կա։ 

Իսկ եթե հնարավոր չլինի ուղղել վրիպակը , ի՞նչ քայլեր եք պատրաստվում ձեռնարկել թույլ տված բացը լրացնելու համար։

Վստահված անձերի ամբողջական և լիարժեք մասնակցության միջոցով այդ մի քանի ընտրատեղամասում։

Բայց չէ՞ որ հանձնաժողովի անդամի և վստահված անձի լիազորությունները հավասար չեն. հանձնաժողովի անդամինը անհամեմատ ավելի մեծ են։

Վստահ եմ, որ դուք ևս ներկա կլինեք՝ մեր բացերը լրացնելու, մեր սխալները ուղղելու համար (ժպտում է)։ 

Օվսաննա Գևորգյան