Սփյուռքի նախարարը բարձր գնահատեց հայ-լիբանանյան ջերմ, բարեկամական հարաբերությունները

Ապրիլի 23-ին ՀՀ սփյուռքի նախարար Հրանուշ Հակոբյանն ընդունեց Լիբանանի Հանրապետության մշակույթի նախարար Գաբի Լեյունի գլխավորած պատվիրակությանը, որի կազմում էին նախարարի խորհրդական Միշել դը Շատարևյանը և լիբանանահայ գրող, թարգմանիչ և գրաքննադատ Սարգիս Կիրակոսյանը:

Ողջունելով հյուրերին՝ նախարար Հ. Հակոբյանը բարձր գնահատեց հայ-լիբանանյան ջերմ, բարեկամական հարաբերությունները՝ նշելով, որ մեր ժողովուրդը երախտագիտությամբ է հիշում Լիբանանի և նրա ժողովրդի ջերմ վերաբերմունքը Օսմանյան կայսրությունում իրականացված Հայոց Ցեղասպանությունից մազապուրծ հայությանը ապաստան տալու, օրհասական պահին սատար կանգնելու և աջակցելու հարցում:

Գաբի Լեյունը նշեց լիբանանահայ համայնքի կարևոր դերակատարությունը Լիբանանի քաղաքական, տնտեսական, մշակութային կյանքում և այլ ոլորտներում' ընդգծելով, որ լիբանանահայերը արժանի և օրինակելի քաղաքացիներ են:

Հանդիպման ընթացքում անդրադարձ կատարվեց Լիբանանի հայ համայնքի հիմնախնդիրներին առնչվող հարցերի: Քննարկվեց Հայաստանում Լիբանանի հայ համայնքի օրեր անցկացնելու հնարավորությունը:

Հ.Հակոբայնը Գաբի Լեյունին նվիրեց ՀՀ սփյուռքի նախարարության կողմից հրատարակված «Ցավի, հիշողության և պայքարի կոթողներ» պատկերագիրքը, որն ընդգրկում է Հայոց Ցեղասպանության զոհերի հիշատակին նվիրված հուշակոթողների լուսանկարներ և տեղեկություններ դրանց վերաբերյալ: Պատկերագրքում տեղ են գտել նաև Լիբանանում գտնվող Հայոց Ցեղասպանության զոհերի հիշատակին նվիրված յոթ հուշակոթողների լուսանկարները: