Վաղուց արդեն ժամանակն է անշրջելիորեն փոխել մեր քաղաքական կյանքի մթնոլորտը. Սերժ Սարգսյան

ՀՀ նախագահ, ՀՀԿ առաջնորդ Սերժ Սարգսյանն այսօր նախընտրական հանդիպումներ է ունեցել մայրաքաղաքի Նոր Նորք և Նորք-Մարաշ վարչական շրջանների ընտրողների հետ:

Նոր Նորքի բնակիչների հետ հանդիպմանը Սերժ Սարգսյանն ընդգծել է, որ Հանրապետական կուսակցությունը համերաշխության ջատագովներից է, որին հաջողվել է մեղմել Հայաստանում քաղաքական պառակտվածության ու անհանդուրժողականության դրսևորումները:

«Մենք ասում ենք ժամանա՛կն է, այո՛, վաղուց արդեն ժամանակն է անշրջելիորեն փոխել մեր քաղաքական կյանքի մթնոլորտը»,-ասել է Սերժ Սարգսյանը: ՀՀԿ ղեկավարի կարծիքով՝ Հանրապետական կուսակցությունը և ինքն անձամբ արել են ամեն ինչ, որպեսզի մեր երկրում հաստատվի համաձայնության քաղաքական մշակույթ և քաղաքական կյանքում ներգրավված լինեն բոլոր խավերի և շերտերի ներկայացուցիչները: Սերժ Սարգսյանի վստահեցմամբ՝ ՀՀԿ-ն շարունակելու է հավատարիմ լինել դրան և համաձայնության եզրեր փնտրել ու գտնել՝ ներգրավելով բոլոր շահագրգիռ կողմերին:

«Մենք խոսում ենք փոփոխությունների մասին՝ ասելով, որ հավատում ենք դրանց անհրաժեշտությանը: Այո՛, ժամանակն է անհրաժեշտ փոփոխությունները կյանքի կոչելու: Եվ մեր խոսքը հիմնավոր դարձնելու, այն ամրապնդելու համար մենք սկսել ենք ինքներս մեզնից»,-ասել է Սերժ Սարգսյանը:

ՀՀԿ առաջնորդն ընդգծել է, որ Հանրապետականը վճռական է տրամադրված մեր երկրում եղած թերությունների դեմ պայքարելու հարցում՝ շեշտելով, որ ՀՀԿ–ն շատ լավ գիտակցում է իր թերությունները և պատրաստ է դրանք հաղթահարելու՝ միավորելով բոլորի ջանքերը: