«Չորրորդ ինքնիշխանություն». Լյովա Խաչատրյանը ժամանակավոր գրանցումներ է ապահովում ապարանցիների համար

Նախկին «Ժողպատգամավոր» խմբի անդամ, այնուհետև ՕԵԿ ներկայացուցիչ, օրերս էլ ԲՀԿ շարքերը համալրած «Նիգ Ապարան» հայրենակցական միության անդամ Լյովա Խաչատրյանը, ով այս անգամ էլ մեծամասնական ընտրակարգով իր թեկնածությունն է առաջադրել Էրեբունի և Շենգավիթ համայնքներն ընդգրկող թիվ 12 ընտրատարածքում, այն կարծիքին է, որ այդ ընտրատարածքում իր հիմնական և գլխավոր մրցակիցը ժամանակն է:

«ՉԻ»-ի հետ զրույցում այսպես է պատասխանել ապարանցի Լյովա Խաչատրյանը այն հարցադրմանը, թե ո՞ւմ է նա համարում իրեն հիմնական մրցակից. «Ես վստահ եմ, որ եթե ժամանակիս մեջ տեղավորվեմ, ամե ինչ շատ լավ կլինի, ընենց, որ չես էլ պատկերացնում: Հասկանո՞ւմ ես, կարևորը քեզ պիտի ներկայացնես ընտրողներին»,- ասաց Խաչատրյանը: Դիտարկմանը՝ թե արդյո՞ք Խաչատրյանը ծանոթ է թիվ 12-ում առաջադրված նախկին ԲՀԿ-ական, ներկայում ՕԵԿ թեկնածու Ռոբերտ Մասումյանին՝ Բենզին Ռուբոյին, վերջինս արձագանքեց. «Այ մարդ, օրը ցերեկով ի՞նչ Բենզին Ռուբո, ի՞նչ բան: Նորմալ, «ցենտր» ընտրություններ ենք անելու, դուք էլ դրա ականատեսն եք լինելու: Ես ոնց որ Ապարանում եմ ակտիվ պայքար տարել, այնպես էլ Շենգավիթում եմ ծավալելու»: Իսկ երբ թերթի թղթակիցը փորձել է Խաչատրյանից ճշտել՝ ի վերջո, նա ապարանցի՞ է, թե՞ շենթավիթցի, վերջինս նկատեց. «Ես համ ապարանցի եմ, համ շենգավիթցի եմ, համ էլ ՀՀ քաղաքացի. բայց ինձ ի՞նչ է եղել որ»:

Ավելացնենք, որ, թերթի տեղեկություններով, Շենգավիթի համայնքի «Մանուշակ» կոչվող շենքից բազմաթիվ մարդիկ ժամանակավոր գրանցում են ստացել Կենտրոն համայնքում, մասնավորապես՝ Մետաքսի շենքերում, իսկ Լյովա Խաչատրյանն էլ այս օրերին իր ընտրատարածքում ժամանակավոր գրանցումներ է ապահովում ապարանցիների համար: