Թուրքիայում մահապարտների ցուցակ կա. Դավութօղլու

Թուրքիայում պոտենցիալ մահապարտների որոշակի ցուցակ կա:

Այս մասին, ինչպես հաղորդում է «Արմենպրես»-ը, թուրքական NTV հեռուստաալիքին տված հարցազրույցում հայտարարել է վարչապետ Դավութօղլուն:

Դավութօղլուի խոսքով' երկրի անվտանգության մարմինները հետևում են նրանց:

Անկարայում շաբաթ օրը տեղի ունեցած ահաբեկչական պայթյուններից հետո Թուրքիայի ազգային հետախուզական կազմակերպությունը (MIT) զգուշացրել էր երկրում կրկնական ահաբեկչական գործողությունների իրագործվելու հհնարավորության մասին:

MIT-ի տվյալներով' ևս 20 ահաբեկիչ-մահապարտներ պատրաստվում են ահաբեկչական գործողությունների Թուրքիայի տարբեր քաղաքներում:

Պատասխանելով Անկարայում պայթյունների հեղինակների հայտնաբերման մասին հարցին, Դավութօղլուն ասել է, որ միջադեպի վայրում հայտնաբերված երկու մահապարտներից մեկի անունը տանում է դեպի մի կազմակերպություն, որի անվանումը կհայտարարվի ահաբեկչական գործողությունն այդ կառույցի կողմից իրագործվելն ապացուցվելուց հետո:

Անկարայում պայթյունների հետևանքով պաշտոնական տվյալներով զոհվել է 97, վիրավորվել 246 քաղաքացի:

LifeNews կայքը հայտնում է, որ Անկարայում տեղի ունեցած ահաբեկչության զոհերի թիվը հասել է 126-ի, վիրավորների թիվը' մոտ 400-ի:

Թուրքիայի խորհրդարանում 80 պատգամավոր ունեցող միակ քրդական Ժողովուրդների դեմոկրատական կուսակցության (HDP) տվյալներով' պայթյունների հետևանքով զոհվել է 128, վիրավորվել 516 մարդ: