ՀՀԿ–ն խոչընդոտում է Վլադիմիր Կարապետյանի քարոզարշավը. հայտարարություն

Թիվ 2 ընտրատարածքում առաջադրված պատգամավորության թեկնածու Վլադիմիր Կարապետյանը Facebook սոցցանցի իր պաշտոնական էջում հայտարարություն է զետեղել։ Վլադիմիր Կարապետյանը հայտնում է, որ նախօրեին Նոր Նորքի 7-րդ զանգվածում Հանրապետական կուսակցության ներկայացուցիչները փորձել են խոչընդոտել իր քարոզարշավը։

«Ս.թ. ապրիլի 23-ին Նոր Նորքի 7-րդ զանգվածում քարոզարշավ անցկացնելու ընթացքում Հանրապետական կուսակցության ներկայացուցիչները փորձել են խոչընդոտել Վլադիմիր Կարապետյանի քարոզարշավը:

ՀՀԿ եւ տվյալ՝ թիվ 2 ընտրատարածքում ՀՀԿ-ական թեկնածու Ս. Ֆարմանյանի ներկայացուցիչները քարոզարշավի ընթացքում հրահրել են քաշքշոց՝ աղմկելով եւ սադրիչ հայտարարություններ տեղալով Հայ Ազգային Կոնգրեսի թեկնածուի թիմակիցների հասցեին: Միջադեպի վտանգավոր զարգացումը հնարավոր է եղել կանխել Նոր Նորքի 7-րդ զանգվածի բնակիչների ակտիվ մասնակցությամբ, ինչի շնորհիվ ՀՀԿ ներկայացուցիչները չկարողացան ձախողել Վ. Կարապետյանի հանդիպումը:

Օրինակելի եւ քաղաքակիրթ ընտրապայքարի մասին՝ ՀՀԿ-ական թեկնածուի հայտարարությունները դատարկ հնչյուն են ի դեմս այն փաստի, որ նրա թիմակիցները մեզ հետ խոսում են նույն լեզվով՝ ինչ իր համախոհ կուսակցի թիմին հարող «պատվիրովի» կանայք թիվ 7 ընտրատարածքում, եւ փորձում են նույնպիսի քրեական խայտառակ պատկեր վերարտադրել թիվ 2 ընտրատարածքում:

Միաժամանակ, Ս. Ֆարմանյանի կողմից' տեղի ունեցած քաշքշուկի եւ քարոզարշավը խոչընդոտելու մասին արձագանքի բացակայությունը վկայում է, որ միջադեպը ուղղորդված էր ՀՀԿ կուսակցության եւ նրա թեկնածուի կողմից»,- ասված է հայտարարությունում։