Արտաքին քաղաքական օրակարգում ցեղասպանության ճանաչման հարց չպիտի լինի. Վլադիմիր Կարապետյան (տեսանյութ)

Հայոց ցեղասպանության միջազգային ճանաչման գործընթացը կանգնեցրել է Սերժ Սարգսյանի իշխանությունը: Լուրեր.com-ի հետ զրույցում նման տեսակետ հայտնեց ՀԱԿ անդամ, թիվ 2 ընտրատարածքում մեծամասնական ընտրակարգով առաջադրված Վլադիմիր Կարապետյանը:

«Այն տարիների ընթացքում, երբ Սերժ Սարգսյանն աշխատել է վարչապետ, այնուհետև նախագահ, միայն մեկ երկիր է ճանաչել հայոց ցեղասպանությունը և դա շնորհիվ Թուրքիայի նկատմամբ իր վարած քաղաքականության, ինչպես նաև շնորհիվ արձանագրությունների, որտեղ Սերժ Սարգսյանը համաձայնել է պատմաբանների ենթահանձնաժողովի ստեղծմանը: Այդ հանձնաժողովի առկայությունը օգտագործելով` Թուրքիան կարողացավ ձախողել տարբեր երկրներում ցեղասպանության ճանաչման վերաբերյալ բոլոր փորձերը: Այսօր որևէ երկրում անգամ գործընթաց չկա այդ ուղղությամբ»,- նշեց Կարապետյանը:

Ներկայացնելով ՀԱԿ-ի մոտեցումը` Վլադիմիր Կարապետյանն ասաց, որ արտաքին քաղաքական օրակարգում նման հարց չպիտի լինի` հավելելով, որ դա տարբեր շահարկումների և հարցի` քաղաքական առևտրի մեջ օգտագործման հնարավորություն է տալիս: