Օբաման հնարավոր է երբևէ չարտասանի «Ցեղասպանություն» բառը՝ որպես ԱՄՆ նախագահ

Հայոց Ցեղասպանության 97-րդ տարելիցի կապակցությամբ ԱՄՆ նախագահ Բարաք Օբաման ուղերձ է հղել։ Այս անգամ ևս, Օբաման իր ուղերձում չի օգտագործել «ցեղասպանություն» բառը` կրկին անգամ 20-րդ դարի ոճրագործությունը որակելով «Մեծ Եղեռն»:

Օբայամայի ուղերձում մասնավորապես ասված է.

«Այսօր մենք նշում ենք «Մեծ Եղեռնը»` 20-րդ դարի ամենասարսափելի գազանություններից մեկի տարելիցը, նաև հարգում ենք 1,5 մլն հայերի հիշատակը, ովքեր գազանաբար սպանվեցին, կամ ստիպված էին գնալ մահվան Օսմանյան կայսրության վերջին տարիներին: Մենք միանում ենք այն միլիոնավոր մարդկանց, ովքեր այսօր հիշում են 97 տարի առաջ տեղի ունեցած աննկարագրելի դեպքերը: Մեր քայլերն ուղղված են լինելու նման իրադարձությունների կանխմանը:

1915-ին տեղի ունեցածների վերաբերյալ իմ տեսակետները հայտնել եմ: Իմ տեսակետն այս հարցում չի փոխվել: Իրականությունը ամբողջական, անկեղծ և արդար ճանապարհով ընդունելը բոլորիս օգտին կլինի: Դեպի ապագա տեղաշարժ չի լինի, քանի դեռ անցյալի հետ հաշիվները չեն պարզվել: ԱՄՆ-ը բազմաթիվ անգամներ այդպես վարվել է իր պատմության ընթացքում և ես հավատում եմ, որ մենք դրանից ավելի ուժեղ ենք դարձել: Որոշ կազմակերպություններ ապագային ուղղված համարձակ քայլեր արդեն ձեռնարկել են: Եվ ես ողջունում եմ այդ ճանապարհն ընտրած հայերին ու թուրքերին:

Չնայած այս ողբերգությանը՝ ձեր հավատը, խիզախությունն ու ուժը թույլ տվեցին ձեզ վերապրել ու բարգավաճել, համայքներ ստեղծելով ողջ աշխարհում: Չահաբեկվելով՝ դուք պահպանեցիք ձեր ժառանգությունը, փոխանցելով այն սերնդեսերունդ: Ամերիկայի հայերը հսկայական ավանդ ունեն ԱՄՆ զարգացման գործում, ինչպես նաև մեծ ներդրում ժողովրդավարական, ազատ ու բարեկեցիկ Հայաստանի զարգացման գործում: ԱՄՆ-ն հպարտանում է ձեր ժառանգությամբ ու նրանով, թե ինչպես եք դուք հարգում այն մարդկանց հիշատակը, որոնք զոհվեցին գրեթե 100 տարի առաջ:

Հիշատակի այս հանդիսավոր օրը մենք կանգնած ենք բոլոր հայերի կողքին' հիշելով «Մեծ եղեռնի» մութ էջերը եւ հանձն առնելով Հայաստանի ժողովրդի համար լուսավոր ապագայի երաշխավորումը»: