Թուրքիայի իշխող կուսակցությունն անգամ սեռական փոքրամասնության ձայներն է խնդրում

Թուրքիայում հունիսին անցկացված հերթական խորհրդարանական ընտրությունների արդյունքներով միանձնա կառավարություն ձևավորելու հնարավորությունից զրկված իշխող «Արդարություն և զարգացում» կուսակցությունը (ԱԶԿ), վախենալով, որ կարող է նույնպիսի անհանջողություն ունենալ նաև նոյեմբերի 1-ին անցկացվելիք արտահերթ խորհրդարանական ընտրություններում, խնդրում է անգամ սեռական փոքրասմանության (ԼԳՏՊ) համայնքի ձայները:

Ինչպես հաղորդում է «Արմենպրես»-ը' վկայակոչելով թուրքական ԶԼՄ-ները, Թուրքիայի բոլոր հասարակական կազմակերպությունների հետ միասին, ԱԶԿ-ն իր օգտին քարոզչություն պարունակող նամակներ է ուղարկել նաև ԼԳՏՊ համայնքներին' խնդրելով ընտրություններում քվեարկել իր օգտին:

Թուրքական ԶԼՄ-ները միաժամանակ հիշեցրել են, որ Ստամբուլի նահանգապետարանն առանց որևէ պատճառաբանության վերջին պահին մերժել էր այս տարի անցկացվելիք ԼԳՏՊ «Հպարտության երթը», որը 12 տարի շարունակ անցկացվել էր առանց միջադեպերի: Ստամբուլի անվտանգության մարմիններն անգամ ջրցան մեքենաներ և արցունքաբեր գազ են օգտագործել երթի համար հավաքված համասեռամոլների և նրանց համակիրների դեմ: