Սամվել Ֆարմանյանը հանդես է եկել հայտարարությամբ

Թիվ 2 ընտրատարածքում ՀՀԿ-ի կողմից մեծամասնական ընտրակարգով պատգամավորության թեկնածու առաջադրված Սամվել Ֆարմանյանը Facebook սոցիալական ցանցի իր էջում գրել է.

«Նախապես ներողություն եմ խնդրում բոլոր այն քաղաքացիներից, ովքեր արդարացիորեն հոգնել են ինչպես մրցակցիս ամենօրյա դիմում-բողոքների, գանգատների և հայտարարությունների, այնպես էլ դրանց՝ իմ կողմից պարտադրված պատասխանների վերաբերյալ հաղորդագրություններից և գրառումներից: Իմ մասով սա վերջին նմանատիպ գրառումն է:

Պարտավոր եմ խոստովանել, որ էապես չափազանցված դուրս եկան իմ նախնական տպավորություններն ու պատկերացումները մրցակցիս՝ Վլադիմիր Կարապետյանի մասին, որոնք ձևավորվել էին մեր հանդիպումների, շփումների և միջնորդավորված երկխոսության ընթացքում: Արդեն իսկ ակնհայտ է, որ հասու բոլոր միջոցներով՝ մամուլում և սոցցանցերում տարածվող ապատեղեկատվությունը, սուտը, կեղծիքը, վարկաբեկիչ հրապարակումներն ու անձնական վիրավորանքները, անհանդուրժողականություն սերմանող հրապարակումները, իսկ վերջին օրերին նաև սադրանքներն ու զրպարտությունն են կազմում այն ողջ զինանոցը, որով մրցակիցս պատասխանում է օրինակելի և քաղաքակիրթ ընտրապայքար տանելու իմ նախաձեռնություններին և հանդուրժողականության կոչերին:

Դատապարտելով ընտրական գործընթացի որևէ խախտում կամ շեղում, ում կողմից էլ այն թույլ տրվի կամ տրված լինի՝ կոչ եմ անում ընտրական գործընթացի բոլոր դերակատարներին, այդ թվում' նախընտրական քարոզչության մեջ ներգրավված իմ բոլոր աջակիցներին, չտրվել սադրանքների, անուշադրության մատնել վիրավորական և զրպարտիչ որևէ հայտարարություն' ցուցաբերելով զգոնություն ու սառնասրտություն:

Սույն հայտարարությամբ նաև կոչ եմ անում համապաստախան մարմիններին ձեռնարկել հնարավորը մրցակցիս և իմ՝ ընտրողների հետ բակային և այլ ձևաչափերով հանդիպումների բնականոն ընթացքն ապահովելու ուղղությամբ՝ բացառելու հնարավոր որևէ սադրանք»:

Հիշեցնենք, որ թիվ 2 ընտրատարածքի պատգամավորության թեկնածու Վ. Կարապետյանի նախընտրական շտաբի անդամները, ապրիլի 24-ին շրջելով Նոր Նորքի 9-րդ զանգվածում, նկատել են, որ 55 եւ 26 շենքերի պատերի վրայից պատռել են Վ. Կարապետյանի քարոզչական լուսանկարները: Այդ մասին թեկնածուի շտաբը տարածել էր հաղորդագրություն: