Մենք մտավորական կուսակցություն ենք. «Միավորված հայեր» կուսակցության նախագահ

«Իհարկե ես նրա հետ համաձայն չեմ: Իրենք որտեղի՞ց գիտեն ես պասիվ եմ, թե պասիվ չեմ, թող մի հատ մտնի կայքերը, հանդիպի մեր հետ», - Լուրեր.com-ի հետ զրույցում այսպես արձագանքեց «Միավորված հայեր» կուսակցության նախագահ Ռուբեն Ավագյանը՝ լսելով Երեւանի մամուլի ակումբի նախագահ Բորիս Նավասարդյանի այն տեսակետը, որ ՄՀԿ-ն շատ պասիվ է անցկացնում այս ընտրարշավը: Ռուբեն Ավագյանն ասաց, որ իրենք վճարովի եթերաժամանակից չեն օգտվում: Իրենց տեսակետը, նպատակը, խնդիրները ներկայացնում են նաև ասուլիսների, թերթի, կայքերի, շրջիկ շտաբերի միջոցով: «Մենք մեր նպատակին հասնում ենք, իսկ ով՝ ինչ է ասում, դա իրենց պրոբլեմն է», - նշեց Ռուբեն Ավագյանը:

Վերջինս իրենց քարոզարշավի ընթացքը գնահատեց դրական: «Միշտ ասել եմ և էլի կրկնում եմ, որ մենք միտինգային կոնցեպցիան չենք ընդունում: Մենք մտավորական կուսակցություն ենք և այսօր գյուղացիներին կտրել աշխատանքից, հավաքել, դա մեզ համար անընդունելի է: Դրա համար կա հեռուստատեսություն, դրա համար կան ասուլիսներ, կան կայքեր: Մենք ունենք տաս հազար տպաքանակ ունեցող թերթ, բուկլետներ, շրջիկ շտաբներ՝ այսինքն ինչ–որ պետք է մեր ընտրողներին, մենք ներկայացնում ենք, թե ինչքանո՞վ է այդ ամենն ընկալելի, արդեն կորոշեն մեր ընտրողները: Եթե սովորել են, որ անպայման պետք է ընկնենք փողոցները, գոռանք և առաջարկենք հարյուր հազար աշխատատեղեր, երկու հարյուր հազար աշխատավարձ, հարյուր հազար ներգաղթ Հայաստան, պոպուլիստական հայտարարություններ, միաժամանակ հեռախոսներ բաժանենք, մենք դա մեզ թույլ չենք տա», - նշեց Ավագյանը: