«Չորրոդ ինքնիշխանություն». Նախագահականից առաջարկ չի եղել

«Երեկ տեղեկություն էր հրապարակվել, համաձայն որի՝ Վովա Գասպարյանի՝ ոստիկանություն տեղափոխվելուց հետո համակարգից դուրս եկած որոշ անձինք պատրաստվում են ապաստանել նախագահականում: Մասնավորապես խոսվում էր «Զվարթնոց» օդանավակայանի անվտանգության ծառայության պետ Կարեն Բաբայանի՝ «Շերիֆի»՝ Սերժ Սարգսյանի վերահսկողության ծառայության պետի տեղակալ նշանակելու մասին:

Երեկ «ՉԻ»-ն փորձեց Կարեն Բաբայանից մանրամասներ իմանալ նոր հնարավոր նշանակման մասին: Սակայն Կարեն Բաբայանը մեզ հետ զրույցում ասաց, որ այդ լուրը բացարձակ կապ չունի իրականության հետ: «Ես տանը նստած եմ, այդ ամենի մասին հեռախոսազանգերից եմ իմացել՝ ինձ ասել են, որ էլեկտրոնային կայքերում նման բան կա գրված, բայց դա իրականություն չէ»,– ասաց Բաբայանը: Հնարավո՞ր է, որ նախագահականում որոշում է կայացվել, պարզապես Դուք տեղյակ չեք դրա մասին. շարունակեցինք մենք: «Ոչ: Այդ պարագայում գոնե ինձ պետք է ասած լինեին. ես չեմ էլ պատկերացնում, թե ով կարող էր ինձ զանգահարել ու նման բան ասել, պարզապես վերջին օրերին անընդհատ ինչ-որ բաներ են գրում, որոնք շատ հեռու են իրականությունից: Սա այս դեպքերից մեկն է»՝ եզրափակեց Կարեն Բաբայանը՝ մեկ անգամ ևս ընդգծելով, որ ինքը հրաժարական է ներկայացրել, և այդքանով հարցը փակվել է:

Հիշեցնենք, որ Կարեն Բաբայանը առաջինն էր, որը Գասպարյանի նշանակվելուց անմիջապես հետո ազատման դիմում ներկայացրեց»՝ հայտնում է «Չորրորդ ինքնիշխանությունը»: