Սեփական ժողովրդի վրա առաջին անգամ կրակել է Ռոբերտ Քոչարյանը. Լևոն Տեր-Պետրոսյան

Այսօր Հայ Ազգային Կոնգրեսի ղեկավար կազմը՝ Լևոն Տեր-Պետրոսյանի գլխավորությամբ, մարզային հանրահավաք-հանդիպումներ կանցկացնի Վայոց Ձորի մարզում: Առաջինը ՀԱԿ-ը հանդիպեց Եղեգնաձորի ընտրողների հետ:

Լևոն Տեր-Պետրոսյանը ելույթի սկզբում նախ ներողություն խնդրեց, որ հանդիպմանը իրենց հետ մուրաբա և հինգ հազար դրամ ընտրակաշառք չեն բերել և հավելեց, որ դրանք բերողները շատ կլինեն, իսկ թե որտեղի՞ց կբերեն, Տեր-Պետրոսյանն ասաց. «Որտեղի՞ց: Ձեզնից գողացված փողերով, Ձեզնից յուրաքանչյուրի ձայնը ոչ թե հինգ հազար դրամ արժի, այլ տասը հազար դոլար: Դա այն փողն է, որը բյուջեից գողացվում է և մտնում պետական պաշտոնյաների գրպանը: Բյուջեն 2.5 միլիարդ է։ Հինգ միլիարդն ամեն տարի գողացվում է ձեզանից: Եթե չգողանային, բյուջեն կլիներ յոթ ու կես միլիարդ դոլար»։

Տեր-Պետրոսյանն իր ելությում կոչ արեց ձայն չտալ ՀՀԿ-ին, քանի որ այդ դեպքում ավելի վատ է լինելու և հավելեց, որ 1921-ից՝ Մյասնիկյանից սկսած, Հայաստանի ոչ մի ղեկավար չի կրակել իր ժողովրդի վրա։

«Սեփական ժողովրդի վրա առաջին անգամ կրակել է Ռոբերտ Քոչարյանը: Ի՞նչ փաստարկ պետք է բերի իշխանությունը, որ ասի՝ հավատացե՛ք մեզ, այսուհետ ավելի լավ կլինի»,- ասաց նա: 

Տեր-Պետրոսյանը ժողովրդին կոչ արեց իր ձայնը տալ Կոնգրեսին և նշեց, որ տասնչորս տարվա ընթացքում բնակչությունը պակասել է մեկ միլիոնով:

«Տվե՛ք իշխանությունը Հանրապետականին և Սերժին և հաջորդ 10-14 տարիներին Հայաստանի ժողովուրդը կպակասի ևս մեկ միլիոնով»,-ասաց առաջին նախագահը։

Նշենք նաև, որ Հայ ազգային կոնգրեսը այսօր կշարունակի իր հանդիպումները Վայոց Ձորի մարզի ընտրողների հետ: Հանդիպումներ կլինեն Վայքում, Սիսիանում, Գորիսում: