Հաագային դատարանը մեղավոր է ճանաչել Լիբերայի նախկին նախագահին

Հաագայի միջազգային քրեական դատարանը Լիբերիայի նախկին նախագահ Չառլզ Թեյլորին մեղավոր է ճանաչել երկրի մոտակա շրջանների ապստամբական խմբավորումներին զենք մատակարարելու և աջակցելու համար, ինչի պատճառով շուրջ 10 տարի շարունակվել են ահաբեկչական գործողությունները քաղաքացիական բնակչության դեմ, հաղորդում է BBC–ն։

Հետաքննությունը պարզել է, որ Թեյլորն աջակցել է Հեղափոխական միասնական ճակատին (RUF) ապստամբներին զենք և զինամթերք մատակարարելով, ինչի դիմաց ահաբեկիչներից ստացել է թանկարժեք քարեր։ Ահաբեկիչները Լիբերիայի նախկին դիկտատորին ապօրինի ձեռք բերված թանկարժեք քարերը փոխանցել են մայոզենի դատարկ տարաների մեջ դրված։

64-ամյա Թեյլորը մեղադրվում է 11 ծանր հանցագործությունների մեջ, այդ թվում սպանության, բռնությունների և ահաբեկչական գործողությունների, ինչպես նաև մարդակերություն և Սիերա Լեոնեյում զինված հակամարտություն հրահրելու համար։ Նրա կողմից հրահրված 1991–2001 թթ. քաղաքացիական պատերազմի ընթացքում զոհվել է ավելի քան 120 հազար մարդ։

Չառլզ Թեյլորը Լիբերիայի նախագահի պաշտոնից հրաժարվել է 2003–ին՝ ԱՄՆ-ի ճնշման ներքո, իսկ երեք տարի անց ձերբակալվել է Նիգերիայի օդանավակայանում և հայտնվել Հաագայի միջազգային քրեական դատարանի առաջ։ Թեյլորի գործով հարցաքննվել են շուրջ 100 վկաներ, որոնցից մեկն էլ եղել է սուպերմոդել Նաոմի Քեմբլը, որը նախկին դիկտատորից 1997–ին մի քանի թանկարժեք քարեր էր ստացել։