Բոլորին էլ քաջ հայտնի են «ԲՀԿ–ՀՅԴ–Ռոբերտ Քոչարյան» հարաբերությունները. Արմեն Մարտիրոսյան

ԱԺ «Ժառանգություն» խմբակցության անդամ Արմեն Մարտիրոսյանը, Լուրեր.com-ի հետ զրույցում մեկնաբանելով իր կուսակցական գործընկեր Ստյոպա Սաֆարյանի այն տեսակետը, որ ընտրությունների վերահսկման միասնական շտաբը ՀՀ երկրորդ նախագահ Ռոբերտ Քոչարյանի նախագիծն է, նշեց, որ բոլորին էլ քաջ հայտնի են «ԲՀԿ-ՀՅԴ-Ռոբերտ Քոչարյան» հարաբերությունները: «Ուղղակի պատմական փաստ է, որ Լևոն Տեր-Պետրոսյանի նախագահության ժամանակ Հայաստան եկավ Ռոբերտ Քոչարյանը. բերեցին նրան Հայաստան սկզբում որպես վարչապետ, իսկ Լևոն Տեր-Պետրոսյանի հրաժարականից հետո՝ որպես նախագահի թեկնածու: Այնպես, որ սրանք այն փաստերն են, որոնք գոյություն ունեն և ես չեմ կարծում, որ սրանից ավելին կարելի է մեկնաբանություն անել», - նշեց Արմեն Մարտիրոսյանը:

ԱԺ պատգամավորը չցանկացավ գնահատական տալ ԱԺ-ում քաղաքական ուժերի ներկայացուցիչներից կազմված մոնիթորինգային խմբի աշխատանքներին՝ պատճառաբանելով, որ իրենք չեն մասնակցում այդ աշխատանքներին և ճիշտ կլինի, որ գնահատական տան քաղաքացիները: «Ցանկացած պարագայում մենք ողջունել ենք բոլոր տեսակի նախաձեռնությունները, շտաբերը և մենք պատրաստակամություն ենք հայտնել նյութեր տրամադրել: Որևէ խնդիր այդ առումով չկա, եթե իրենք կոնկրետ գործունեությամբ զբաղվում են, դա ընդամենը կարելի է ողջունել, որևէ խոսք այստեղ չկա: Բայց, եթե իրական խնդիրները չեն լուծվելու, ինչը այս պահին կա՝ ընտրակաշառքներ, խոստումներ, անձնագրերի հավաքագրումներ, ադմինիստրատիվ ռեսուրսի օգտագործում, և այլն, և այլն, ես կարծում եմ, որ սա իհարկե վնաս չի տա ընտրական գործընթացին, բայց կարծես թե՝ օգուտ էլ չի տալիս»,–  նշեց Մարտիրոսյանը:

Վերջինս դրական գնահատեց ԶԼՄ-ների աշխատանքը: «Այս անգամ, ի տարբերություն նախորդի, հատկապես հեռուստաընկերությունների կողմից բավականին լուսաբանումներ եղել են, բայց ցեխարձակումները նախորդի համեմատ չափազանց շատ են: Եվ, ըստ էության, «Ժառանգության» նկատմամբ ցեխարձակումներն սկսվեցին 2009 թվականի Երևանի ավագանու ընտրություններից հետո, ինչն առ այսօր շարունակվում է: Այդ ցեխարձակումների ժամանակ այնքան սուտ է տպագրվել, որ արդեն անթիվ են, բայց ժամանակը եկավ, ապացուցեց, որ ինչ որ կար, սուտ էր գրված, նույնը նաև այս օրերին է», - նշեց պատգամավորության թեկնածուն: