Թուրքիայում ականի պայթյունից 21 զինծառայող վիրավորվել է

Թուրքիայի քրդաբնակ տարածաշրջանի կենտրոն Դիարբեքիրում ճանապարհամերձ ականի պայթյունից տարբեր աստիճանի վնասվածքներ են ստացել երկրի զինված ուժերի 21 զինծառայող: Նրանցից մեկի վիճակը ծայրահեղ ծանր է:

Ինչպես հաղորդում է «Արմենպրես»-ը' վկայակոչելով թուրքական «Հաբերլեր» լրատվական կայքը, դեպքը տեղի է ունեցել թուրքական զինվորական պահակախմբի՝ Դիարբեքիրից դեպի Սիլվան շարժվելու ճանապարհին, որտեղ ուժայինները ռազմական գործողություններ են իրականացնում Քրդստանի աշխատավորական կուսակցության (PKK) ազատամարտիկների դեմ:

Վիրավոր զինծառայողները ուղղաթիռով տեղափոխվել են Դիարբեքիրի զինվորական հիվանդանոց: Նրանցից 13-ը բժշկական օգնություն ստանալուց հետո մեկնել են զորամաս, իսկ 8-ը շարունակում են բուժումը:

Թուրքական ԶԼՄ-ները հայտնում են, որ երեկ Շըռնաքի նահանգի Սիլոպի քաղաքում ոստիկանական մեքենայի վրա կատարված ահաբեկչական պայթյունի հետևանքով երեք ոստիկան զոհվել, մեկն էլ ծանր վիրավորվել է: