Մեկնարկում է «Ազգային Պատկերասրահ» միջազգային երաժշտական փառատոնը

«Արվեստների Պատկերասրահ» Մշակութային Հիմնադրամը ապրիլի 28-ից մայիսի 26-ը ներկայացնում է «Ազգային Պատկերասրահ» Միջազգային Երաժշտական Ութերորդ Փառատոնը:

Ապրիլի 28-ին, ժ.19.00-ին տեղի կունենա «Ազգային Պատկերասրահ» Միջազգային Երաժշտական Ութերորդ Փառատոնի հանդիսավոր բացման «Վիվա Իտալիա» համերգը:

Ծրագրին մասնակցում են երիտասարդ տաղանդաշատ երգիչներ Մերի Մովսիսյանը (սոպրանո), Ռիմա Խաչատրյանը (մեցցո-սոպրանո), Արշակ Կուզիկյանը (բարիտոն),Փառատոնային նվագախումբը՝ Արամ Թալալյանի ղեկավարությամբ:

2012-ին Երևանի՝ Գրքի համաշխարհային մայրաքաղաք հռչակվելու, Հայաստանի ազգային պատկերասրահի՝ այդ միջոցառման շրջանակներում ներգրավվածության կապակցությամբ, Փառատոնը այս տարի կհյուրընկալվի Կոմիտասի անվան Կամերային Երաժշտության Տանը:

«Ազգային Պատկերասրահ» Միջազգային Երաժշտական Ութերորդ Փառատոնը կներկայանա 6 համերգից բաղկացած համերգաշարով, որի շրջանակներում ելույթ կունենան աշխարհահռչակ դաշնակահար Բորիս Բերմանը (ԱՄՆ), «Ակլարդիոն» դուետը (Ռուսաստանի Դաշնություն)՝ Եվգենի Վարավկո (կլարնետ) և Մարիա Վլասովա (ակորդեոն), ՀՀ Վաստակավոր արտիստ, դաշնակահար Արմեն Բաբախանյանը, Թբիլիսիի Ազգային Օպերային Թատրոնի մեներգիչների «Սուլիկո» համույթը (Վրաստան):

Փառատոնի հանդիսավոր փակման համերգը կրում է «Նվիրում Հենդելին» խորագիրը, որին կմասնակցեն երիտասարդ սերնդի ճանաչված երաժիշտներ Մանե Գալոյանը (սոպրանո), Հասմիկ Բաղդասարյանը (սոպրանո), Կարեն Հակոբյանը (կոնտրտենոր, ԱՄՆ), Ջուլիետա Վարդանյանը (կլավեսին), Արմեն Մայիլյանը (շեփոր), Փառատոնային նվագախումբը (գեղարվեստական ղեկավար և դիրիժոր՝ Արամ Թալալյան):