Սկսվել է ԱԻՆ ՃԿԿ և մարդուն հրատապ օգնություն ցուցաբերող 911 ծառայության զարգացման ծրագրի իրականացումը

ԱԻՆ-ի նախաձեռնությամբ անցյալ տարվա դեկտեմբերից Շվեյցարիայի զարգացման և համագործակցության գործակալության աջակցությամբ սկիզբ է դրվել ԱԻՆ Ճգնաժամային կառավարման կենտրոնի և մարդուն հրատապ օգնություն ցուցաբերող 911 ծառայության զարգացման ծրագրին։

Մարտի 14-ին Արտակարգ իրավիճակների նախարար Արմեն Երիցյանը և Շվեյցարիայի զարգացման և համագործակցության գործակալության (ՇԶՀԳ) տարածաշրջանային գրասենյակի տնօրեն Ռուդոլֆ Շոխը ստորագրեցին համաձայնագիր՝ «ՀՀ արտակարգ իրավիճակների նախարարության Ճգնաժամային կառավարման կենտրոնին (ՃԿԿ) խորհրդատվական աջակցություն ցուցաբերելու» ծրագրի վերաբերյալ:

Ծրագրի հիմնական նպատակն է զարգացնել աղետների ռիսկերի նվազեցման բնագավառում Հայաստանի կարողությունները' ԱԻՆ ՃԿԿ-ի գործունեության բարելավման շնորհիվ:

Ապրիլի 26-ին ծրագրի փորձագետներն Արտակարգ իրավիճակների նախարար Արմեն Երիցյանին և ՇԶՀԳ տարածաշրջանային տնօրենի տեղակալ Մատիաս Վայնգարթին ներկայացրեցին մինչ այսօր իրականացված աշխատանքները և հետագա անելիքները։

ԱԻՆ աշխատանքային խմբի հետ համատեղ գործունեության արդյունքում ուսումնասիրվել է առկա իրավիճակը, ի հայտ են բերվել կարիքները և մշակվել բարելացման առաջարկներ։ ԱԻ նախարարի հաստատմանը ներկայացվեց համատեղ մշակված աշխատանքային պլանը։ Արդեն չորս ամիս Հայաստանում աշխատող միջազգային փորձագետներն իրենց առաջարկներն են ներկայացրել ԱԻՆ նորակառույց շենքի, այնտեղ տեղակայվող Ճգնաժամային կառավարման կենտրոնի տեխնիկական և ծրագրային հագեցվածության վերաբերյալ։

Ծրագրի շրջանակներում ԱԻՆ պատվիրակությունն այցելել է Ավստրիայի Ճգնաժամային կառավարման կենտրոն և 122 ծառայություն, ծանոթացել դրանց կառուցվածքին, աշխատանքային պայմաններին, կիրառվող ծրագրերին և տեղեկատվական բազաներին։ ԱԻՆ ներկայացուցիչները մասնակցել են նաև Ռիգայում տեղի ունեցած եվրոպական 112 ասոցիացիայի կոնֆերանսին, որտեղ պայմանավորվածություն է ձեռք բերվել ասոցիացիային ՀՀ ԱԻՆ-ի անդամակցության և համագործակցության վերաբերյալ։

ՇԶՀԳ-ի հետ իրականացվող ծրագրի շրջանակներում նախատեսվում է նաև հրավիրել ուսումնական և վերապատրաստման հարցերով փորձագետի, որն ԱԻՆ Ճգնաժամային կառավարման պետական ակադեմիայի մասնագետների հետ համատեղ կմշակի ուսումնական ծրագիր՝ ԱԻՆ ճգնաժամային կառավարման կենտրոնի և 911 ծառայության աշխատակիցների ուսուցման և վերապատրաստման համար։