ՀՀ գյուղնախարար. «Հազարամյակի մարտահրավերներ» ծրագիրն էական աջակցություն էր՝ ուղղված գյուղատնտեսության ու առհասարակ գյուղի զարգացմանը

ՀՀ գյուղատնտեսության նախարար Սերգո Կարապետյանը նոյեմբերի 9–ին ընդունել է ՀՀ–ում ԱՄՆ արտակարգ և լիազոր դեսպան Ջոն Հեֆերնի գլխավորած պատվիրակությանը:

Ողջունելով նորանշանակ դեսպանին՝ նախարարը շնորհավորել է պատասխանատու պաշտոնում նշանակվելու կապակցությամբ, այնուհետև անդրադարձել նախարարության գործունեությանը՝ մասնավորապես ներկայացնելով ոլորտում իրականացվող պետական ու միջազգային ծրագրերը: Վերջիններիս շարքում կարևորվել են հատկապես ԱՄՆ Գյուղդեպարտամենտի աջակցությամբ իրականացվող ծրագրերը՝ ուղղված վերամշակող արտադրությունների ընդլայնմանն ու կատարելագործմանը: Անդրադարձ է եղել նաև նշված կառույցի կողմից տրամադրված խորհրդատվությանն ու վարկային ռեսուրսների կարևորությանը: Կողմերը գոհունակությամբ են արտահայտվել «Հազարամյակի մարտահրավերներ» ծրագրի և «Ագրոբիզնեսի և գյուղի զարգացման» հիմնադրամի գործունեության վերաբերյալ:

««Հազարամյակի մարտահրավերներ» ծրագիրն էական աջակցություն էր՝ ուղղված գյուղատնտեսության ու առհասարակ գյուղի զարգացմանը: Վերջինիս միջոցով բազմապրոֆիլ աջակցություն ցուցաբերվեց՝ սկսած խորհրդատվությունից մինչև ենթակառուցվածքների արդիականացում, և ծրագրի արդյունքներն առավել քան գոհացուցիչ են»,- հանդիպման ընթացքում նշել է ՀՀ գյուղատնտեսության նախարար Սերգո Կարապետյանը՝ ցանկալի համարելով ծրագրի շարունակականությունը:

Շնորհակալություն հայտնելով ջերմ ընդունելության համար՝ դեսպան Ջոն Հեֆերնը պատրաստակամություն է հայտնել ըստ ամենայնի օժանդակել գյուղատնտեսության ոլորտում իրականացվող ծրագրերի իրագործմանն ու նպաստել ադյունավետ համագործակցության հետագա ընդլայնմանը: