Ադրբեջանը Թուրքիայից 123 միավոր ռազմատրանսպորտային միջոցներ է գնել

Օթոկար թուրքական ընկերությունը, անցյալ տարի ստորագրած պայմանագրի համաձայն՝ Ադրբեջանի Սահմանապահ զորքերի համար տարբեր տեսակի 123 միավոր ռազմատրանսպորտային միջոցներ է առաքել, հաղորդում է 1news.az-ը։

Այս մասին նշվում է՝ կառույցի 2011 թվականի գործունեության վերաբերյալ Թուրքիայի պաշտպանական արդյունաբերության քարտուղարության զեկույցում։

Օթոկար ընկերությունը, 20,7 միլիոն դոլարի պայմանագրի շրջանակներում, ադրբեջանական կողմին է վաճառել «Կոբրա» մակնիշի 35 զրահամեքենա, 37 զրահամեքենա՝ անձնակազմի փոխադրման համար և Land Rover տեսակի 51 տրանսպորտային միջոց։

Զեկույցում ասվում է նաև, որ Թուրքիայի պաշտպանական հատվածում գործող 3 ռազմական կառույց, այդ թվում նաև Օթոկարը, 2010–ի վերջին Ադրբեջանի սահմանապահ զորքերի հետ ավելի քան 300 միլիոն դոլարի պայմանագիր են ստորագրել։

Պայմանավորվածության համաձայն մատարակարումները շարունակվում են։