Թուրքիայի իշխող կուսակցությունը հստակեցրել է մեջլիսի նախագահի իր թեկնածուին

Թուրքիայի Ազգային մեծ ժողովի նախագահի պաշտոնում իշխող «Արդարություն և զարգացում» կուսակցությունը կառաջադրի Իսմայիլ Քահրամանի թեկնածությունը: Ինչպես հաղորդում է «Արմենպրես»-ը՝ վկայակոչելով թուրքական «Անադոլու» գործակալությունը, այս մասին հայտնել է կուսակցության ղեկավարի տեղակալ և խոսնակ Օմեր Չելիքը:

Նոյեմբերի 17-ին Թուրքիայի մեջլիսում պատգամավորների երդմնակալության արարողությամբ մեկնարկեց մեջլիսի 26-րդ գումարման նստաշրջանը: Նույն օրը նախագահ Ռեջեփ Թայիփ Էրդողանն Ահմեդ Դավութօղլուին հանձնարարեց կազմել նոր կառավարություն:

Թուրքիայի մեջլիսի պատգամավորները նոյեմբերի 22-ին կընտրեն ԹԱՄԺ նախագահին: Քանի որ իշխող «Արդարություն և զարգացում» կուսակցությունը ընտրությունների արդյունքներով ստացել է 317 պատգամավորական մանդատ, իսկ մեջլիսի նախագահի ընտրության 1-ին և 2-րդ փուլերում անհրաժեշտ է ստանալ պատգամավորներից 367-ի ձայնը, ԱԶԿ-ն կկարողանա իր թեկնածուին անցկացնել երրորդ փուլով, որտեղ պահանջվում է 276 պատգամավորի ձայն: