«Ժառանգություն»-ն ընդունել է ԵԺԿ փոխնախագահին

«Ժառանգություն» կուսակցության կենտրոնական նախընտրական շտաբում այսօր տեղի է ունեցել ընդունելություն' ի պատիվ Եվրոպական խորհրդարանում Եվրոպայի ժողովրդական կուսակցության (ԵԺԿ) խմբակցության փոխնախագահ Խայմե Մայոր Օրեխայի:

Կուսակցության լրատվական ծառայությունից հայտնում են, որ ընդունելությանը ներկա էին ԱԺ «Ժառանգություն» խմբակցության պատգամավորներ, կուսակցության վարչության, համամասնական ցուցակի անդամներ:

Ողջունելով Խայմե Մայոր Օրեխայի այցելությունը նախընտրական Հայաստան և ԵԺԿ դիտորդ անդամ «Ժառանգության» շտաբ, կուսակցության միջազգային քարտուղար և խորհրդարանական խմբակցության ղեկավար Ստյոպա Սաֆարյանը նշել է. «Իբրև Հայաստանի ժողովրդավարական հեռանկարին հավատարիմ քաղաքական ուժ' «Ժառանգությունը» անցած 5 տարիներին խորհրդարանում ու նրանից դուրս պայքարել է ժողովրդավարության, մարդու իրավունքների ու արժանապատվության եւ եվրոպական արժեքների համար, որոնք կիսում ենք ԵԺԿ մեծ ընտանիքի մեր գործընկերների հետ»:

«Մենք հավատում ենք, որ առաջիկա ընտրություններում, հավատարիմ մնալով փետրվարի 10-ին Բրյուսելում ստորագրված հուշագրի մեր հանձնառություններին, «Ժառանգությունը» կարձանագրի լուրջ հաջողություններ, եւ Հայաստանը եվրոպական կառույցներին ավելի սերտ ինտեգրելու նոր հնարավորություններ կստանա»,– ավելացրել է նա:
Խայմե Մայոր Օրեխան ողջունել է ներկաներին՝ իր ուրախությունը հայտնելով Հայաստան այցելության կապակցությամբ: Նա տեղեկացրել է, որ ԵԺԿ անդամ հայաստանյան երեք կուսակցությունների հետ հանդիպումների շարքը սկսում է «Ժառանգությունից»:

«Եվրոպան, որքան էլ որ այս պահին ազդված է տարատեսակ ճգնաժամերից, հատուկ արժեքների միություն է, և ես ուրախ եմ, որ Հայաստանը մաս է կազմում այդ ընտանիքի և բռնել է եվրաինտեգրման ճանապարհը: Կարևորելով ազատ, արդար եւ թափանցիկ ընտրությունների անցկացումը, կոռուպցիայի դեմ պայքարը, խոսքի ազատության ապահովումը եւ Հայաստանի ընդհանուր ժողովրդավարացումը' ես «Ժառանգությանը» մաղթում եմ հաջողություններ մայիսի 6-ի ընտրություններում եւ ցանկանում, որ այդ ընտրություններում հաղթի Հայաստանի երիտասարդ ժողովրդավարությունը»:- ԵԺԿ-ի ուղերձը «Ժառանգությանը» փոխանցեց է Խայմե Մայոր Օրեխան: