Հասմիկ Պողոսյանն ընդունել է Ռումինիայի մշակույթի և ազգային ժառանգության նախարարին

Հանդիպման ընթացքում ՀՀ մշակույթի նախարար Հասմիկ Պողոսյանը շնորհակալություն է հայտնել Ռումինիայի մշակույթի և ազգային ժառանգության նախարար Հունոր Կելեմենին Հայ գրատպության 500-ամյակին և ՅՈՒՆԵՍԿՕ-ի կողմից Երևանը՝ 2012 թ. գրքի համաշխարհային մայրաքաղաքի հռչակմանը նվիրված տոնական հանդիսություններին մասնակցության հրավերն ընդունլու համար:

Նախարարն իր գործընկերոջ հետ զրույցում կարևորել է երկու երկրների միջև սերտ համագործակցությունը, գնահատանքով անդրադարձել ռումին կառավարության ռումինահայ համայնքի հանդեպ ցուցաբերած հոգածությանը, նաև Ոումինիայում հայկական պատմամշակութային ժառանգության պահպանման, պատշաճ ներկայացման ուղղությամբ տարվող աշխատանքներին: Մասնավորապես մատնանշել է Տրանսիլվանիայի հայկական թանգարանի ստեղծումը, որը բացվել է Դումբըրվեն քաղաքի հայ կաթողիկե Սուրբ Եղիսաբեթ տաճարի հարևանությամբ՝ պատմական Ապաֆի ամրոցում:

Հանդիպման ընթացքում երկու երկրների նախարարներն անդրադարձել են նաև 2012-2013 թթ. համագործակցության խնդիրներին՝ հստակեցնելով առաջնայնությունները, որոնց շարքում դիտարկել են Ռումինիայում անցկացվելիք հայ-ռումինական պատմամշակութային կապերին նվիրված միջազգային գիտաժողովի, Բուխարեստի արվեստի ազգային թանգարանում հայ-ռումինահայ արվեստը և մշակութային ժառանգությունը ներկայացնող ցուցահանդեսի անցկացման, Ռումինիայում հայոց ներկայության մասին պատմող համատեղ վավերագրական ֆիլմի ստեղծման ու հայ-ռումինական առնչակցություններին նվիրված հրատարակության խնդիրները: Նախարար Հասմիկ Պողոսյանի առաջարկով քննարկվել է նաև Բուդապեշտի պատմության թանգարանում «Հայկական գրքի մշակույթը Կարպատյան ավազանում» ցուցահանդեսի կազմակերպման խնդիրները /արխիվային նյութերի, ցուցանմուշների տրամադրում/:

Ռումինիայի մշակույթի և ազգային ժառանգության նախարար Հունոր Կելեմենը իր խոսքում շնորհակալություն է հայտնել ՀՀ մշակույթի նախարար Հասմիկ Պողոսյանին ջերմ ընդունելության համար՝ նշելով, որ թեև առաջին անգամ է լինում Հայաստանում, սակայն առաջին անգամը չէ, որ առնչվում է հայ մշակույթին, քանզի լավագույնս ծանոթ է թե՛ ռումինահայ համայնքին, և թե՛ իր երկրում առկա հայկական մշակութային ժառանգությանը: Նա նաև հավելել է, որ իրենք պատրաստվում են ս. թ. սեպտեմբերի 21-ին Բուխարեստի Կարլ Ա-ի անվան կենտրոնական գրադարանում հայ գրքին և գրատպությանը նվիրված ցուցահանդես կազմակերպել:

Նախարարները նաև անդրադարձել են Հայաստանում նախատեսվող միջոցառումներին, այդ թվում՝ ս. թ. աշնանը Երևանում կազմակերպվող ռումինահայ հանրաճանաչ նկարիչ Միկլոշ Յակոբովիչի անհատական ցուցահանդեսի կազմակերպմանը:

ՀՀ և Ռումինիայի մշակույթի նախարարները անդրադարձել են նաև մշակութային փոխանակումներին, մասնագետների, հատկապես երիտասարդ սերնդի ներկայացուցիչների փոխայցելություներին՝ կարևորելով Բուխարեստի համալսարանում հայերենի և Երևանի Բրյուսովի անվան լեզվաբանական համալսարանում ռումիներենի դասավանդման խնդիրները' ելնելով բարձրորակ թարգմանիչների պատրաստման և ազգային գրականությունները միմյանց ներկայացնելու հեռանկարային անհրաժեշտությունից: