Սիրիայի բանակը հարձակում է ծավալել Լաթաքիայի հյուսիսում, ազատագրվել է 9 գյուղ

Կառավարական զորքերը ժողովրդական աշխարհազորի օժանդակությամբ մեկ օրվա ընթացքում վերահսկողության տակ են վերցրել մի շարք ռազմավարական բարձունքներ Լաթաքիայի նահանգի հյուսիս-արևմուտքում և հյուսիս-արևելքում, ազատագրվել է ինը գյուղ: Այդ մասին, ինչպես տեղեկացնում է «Արմենպրես»-ը, հաղորդել է սիրիական ՍԱՆԱ ազգային գործակալությունը՝ վկայակոչելով զինվորական աղբյուրի:

«Բանակը և աշխարհազորը գրավել են ռազմավարական տեսակետից կարևոր Քիթֆ ալ Գադեր և ալ Մլյուխա բարձունքները Հալեպի հարավ-արևելքում Մարտերը երեկոյան վերսկսվել են նաև նահանգի հարավ-արևմուտքում: Վերահսկողության տակ են վերցվել 9 գյուղ և մի շարք բարձունքներ Ջիբ ալ Ահմարի շրջանում»,- մեջբերում է գործակալությունն աղբյուրին:

Աղբյուրի խոսքով՝ հատուկ գործողության ընթացքում ոչնչացվել են մեծ թվով ահաբեկիչներ տարբեր խմբավորումներից, այդ թվում՝ օտարերկրացի վարձկաններ: Մարտական գործողությունները շարունակվում են Հալեպի նահանգի հարավ-արևմուտքում՝ Թուրքիայի սահմանից 30 կիլոմետր հեռավորության վրա:

Ջիբ ալ Ահմարում բարձունքները ռազմավարական են համարվում Սալմա քաղաքին մոտ գտնվելու պատճառով, որը համարվում է Լաթաքիայի հյուսիսում «Ջեբհաթ ան Նուսրա» ահաբեկչական խմբավորման գլխավոր պատվարը, բարձունքների մյուս կողմից ձգվում է այն մայրուղին, որը տանում է Իդլիբի նահանգի՝ ահաբեկիչների կողմից զավթված Ջիսր աշ Շուգուր քաղաք, հաղորդել է ՌԻԱ Նովոստին: