Խոչընդոտել են ՀԱԿ թեկնածուի քարոզարշավը

Թիվ 13 ընտրատարածքում մեծամասնական ընտրակարգով առաջադրված պատգամավորության թեկնածու, ՀԱԿ ներկայացուցիչ Մանուշակ Վարդանյանին Սարի թաղում խոչընդոտել են անցկացնել իր քարոզարշավը: Լուրեր.com-ի հետ զրույցում Վարդանյանը, անդրադառնալով այդ հարցին, ասաց, որ նա մի քանի երիտասարդների հետ մեկնել է Սարի թաղ՝ բնակիչների հետ հանդիպելու, զրուցելու և բուկլետներ բաժանելու նպատակով:

«Խմբերի բաժանվեցինք, բայց խնդրեցի երիտասարդներին, որ ինձնից հեռու չլինեն և եթե որևէ խնդիր լինի, ահազանգեն ինձ: Մենք երևի թե մի կես ժամ շատ հանդարտ, գեղեցիկ, զրուցելով, բուկլետը տալով՝ առաջ էինք գնում, երբ զանգ եկավ, որ ներքևում՝ մեքենաների մոտ մնացած մեր մարդկանց են մոտեցել ինչ-որ տղամարդիկ և պատռում են թերթերը, բուկլետները, գոռգոռում են՝ թե «հեռացեք այստեղից, ձեզ ով է թույլ տվել, սա մեր թաղերն են, դուք այստեղ անելիք չունեք, մենք թույլ չենք տա, որ դուք այստեղ տարածեք ձեր բուկլետները, մեր ժողովուրդը գիտի, թե ում պետք է ընտրի»»,- պատմեց ՀԱԿ թեկնածուն:

Մանուշակ Վարդանյանի խոսքերով, երբ նա մոտեցել է այդ տղամարդկանց, վերջիններս հարձակվել են իր վրա՝ պահանջելով հեռանալ, ինչին ի պատասխան նա նշել է, որ իրականացնում է Սահմանադրությամբ սահմանված իր իրավունքները:

Վարդանյանի պատմածով՝ տվյալ անձանց որևէ քաղաքական ուժ չէր էլ հետաքրքրում. «Իրենք ինձ անընդհատ ասում էին, որ ես այնտեղ անելիք չունեմ, իրենց Սարի թաղն ունի իր կողմից հարգված մեկին, նունիսկ անունը չէին տալիս, բնականաբար, նկատի ունեին Մհեր Սեդրակյանին: Ես շատ ուրախ եմ դրա համար, գնացեք և քվեարկեք նրա օգտին, բայց ինչ իրավունք ունեք բոլորի անունից խոսելու ասացի», - նշեց Մանուշակ Պետրոսյանը:

ՀԱԿ ներկայացուցիչը նշեց նաև, որ մինչ այս իր կողմից անցկացրած քարոզարշավի ընթացքում խոչընդոտներ եղել են, երբ խափանվել է հանդիպում, սակայն բռնություն, տգեղ խոսակցություն, բիրտ դրսևորումներ չեն եղել. «Որևէ տգեղ խոսակցություն կամ այդպիսի բիրտ դրսևորում չի եղել, դա նորմալ խոսակցություն է, որևէ կոպիտ բան չի կատարվել», - նշեց Մանուշակ Պետրոսյանը՝ հավելելով, որ ինքն արդեն դիմել է Էրեբունու ոստիկանություն: «Հիմա պետք է ներկայացուցիչը գա, որպեսզի վավերացնի իմ հայտարությունն այդ միջադեպի մասին», - նշեց Մանուշակ Պետրոսյանը:

Ազատուհի Արասխանյան