«Ժառանգություն»-ը երբեք դեմ չի արտահայտվել Ղարաբաղի և Հայաստանի վերամիավորմանը. Ստյոպա Սաֆարյան (տեսանյութ)

Իր վերջին ասուլիսի ժամանակ «Ժառանգության» առաջնորդ Րաֆֆի Հովհաննիսյանը, անդրադառնալով հայ–թուրքական հարաբերություններին և հայտնի արձանագրություններին, նշել էր, որ վերջիններս հակահայկական և հակապետական փաստաթղթեր են, մինչդեռ այդ կուսակցության համամասնական ցուցակի 6–րդ հորիզոնականը զբաղեցնում է «Մարդկային զարգացման միջազգային կենտրոն» ՀԿ–ի տնօրեն Թևան Պողոսյանը, ով ժամանակին հանդես է եկել հայ–թուրքական արձանագրությունների պաշտպանության օգտին։

Այդ հակասությունը բացատրելու խնդրանքով դիմեցինք «Ժառանգություն» կուսակցության պատգամավոր Ստեփան Սաֆարյանին, ով ճշգրտում մտցրեց հարցադրման մեջ՝ նշելով, որ «Թևան Պողոսյանն իր կազմակերպության շրջանակներում, կազմակերպել է ծրագիր, որտեղ ուղղակի տվել է չորս սցենար և փորձել է, այսպես կոչված, շրջանային հավաքների միջոցով պարզել չորս տարբերակների վերաբերյալ ժողովրդի վերաբերմունքը»։

Լուրեր.com-ի թղթակցի այն դիտարկմանը, թե 2009թ.–ին 7or.am–ին տված հարցազրույցում Թևան Պողոսյանը կողմ էր արտահայտվել արձանագրություններին և ճիշտ քայլ էր համարել դրանց ստորագրումը, Սաֆարյանը պատասխանեց. «Հայտարարվել է, որ «Ժառանգության» բոլոր անդամները տեր են Հայոց ցեղասպանության և հայոց մեծ հայրենազրկման խնդիրների լուծմանը։ Բացի դրանից, «Ժառանգության» թիմի նախընտրական ծրագիրը, «Ժառանգության» ցուցակի և նախընտրական թիմի բոլոր անդամների դիրքորոշումն այն է, որ հայ–թուրքական արձանագրությունները պետք է հետ կանչվեն ԱԺ–ից, փոփոխությունների ենթարկվեն՝ նրանցից հանելով նախապայմանները», – մանրամասնեց պատգամավորը՝ հավելելով, որ եթե անգամ Թևան Պողոսյանը լիներ այդ դիրքորոշմանը, ինքն այդտեղ խնդիր չի տեսնում։

««Ժառանգության» թիմի բոլոր անդամները իրենց դիրքորոշմամբ, իրենց ստորագրությամբ վավերացրել են հայ–թուրքական հարաբերությունների վերաբերյալ այն պատկերացումները, որոնք շարադրված են մեր կուսակցության ծրագրում, «Ուխտ նոր Հայաստանի» հռչակագրում և «ժառանգության» թիմի 2012թ.–ի նախընտրական ծրագրում», – հավելեց նա։

Իսկ հարցին, թե այդ «Նոր Հայաստանի» կազմում «Ժառանգություն»–ը տեսնո՞ւմ է Ղարաբաղը, ինչպես օրինակ՝ ՍԻՄ նախագահ Հայկ Բաբուխանյանը, ով կարծիք էր հայտնել, թե Ղարաբաղը պետք է Հայաստանի մաս կազմի, Սաֆարյանը նշեց, որ Ղարաբաղի մասով իրենց դիրքորոշումը հստակ է. «Լեռնային Ղարաբաղի հանրապետությունը՝ իր տարածքային ամբողջականությամբ և պետական ամբողջականությամբ, ենթակա է ճանաչման միջազգային հանրության և Հայաստանի կողմից, և դրա միջազգային իրավական ամրագրումը պիտի լինի ՀՀ արտաքին քաղաքականության առանցքը»։

Ինչ վերաբերում է երկու պետությունների վերամիավորման հարցին, Սաֆարյանը նշեց, որ «Ժառանգություն» կուսակցությունը չի բացառում կամ երբեք դեմ չի արտահայտվել Ղարաբաղի և Հայաստանի վերամիավորմանը։ «Բայց քանի որ «Ժառանգությունը» գտնում է, որ տվյալ պարագայում որոշիչը ժողովուրդների կարծիքն է և ժողովուրդների ձայնն է, հետևաբար, եթե Հայաստանի և ԼՂՀ ժողովուրդները վերստին վերաամրագրեն իրենց ցանկությունը միասին ապրելու, ապա «Ժառանգություն»-ը միայն կողջունի դա։ Բայց տվյալ պարագայում, որպես ապագաղութացման պրոցեսի ավարտ և իրավական ամրագրում, «Ժառանգություն»-ը գտնում է, որ դա պետք է տեղի ունենա ինքնորոշման իրավունքի հիման վրա՝ հարգելով ԼՂՀ արդեն իսկ ինքնորոշված ժողովրդի կամքը, կարծիքը և նրա պետականությունը», – եզրափակեց նա։