Սեղանի դարակում 35 տարի մնացած ականջօղերը վաճառվել են 2,6 մլն ԱՄՆ դոլարով

Ռումինիայի թագավոր Կարոլ 2-րդի կողմից իր սիրեցյալին նվիրած մարգարտե ականջօղերը վաճառվել են Մեծ Բրիտանիայում անցկացված աճուրդում 2,6 մլն ԱՄՆ դոլարով, գրում է Guardian-ը:

Միապետի «սրտի տիրուհին» այդ թանկարժեք նվերը կտակել է իր բրիտանացի ընկերուհուն: Սակայն, ականջօղերի նոր տիրուհին, դրանք համարելով չափազանց ծանր կրելու համար, մոռացության է մատնել դրանք՝ 35 տարի թողնելով սեղանի դարակում:

Ականջօղերն այս տարի որպես ժառանգություն բաժին են հասել այդ կնոջ զարմիկին: Զարդի նոր տերը որոշել է դրանց հետ վարվել «տղամարդավարի»՝ դրանք տանելով աճուրդի տուն: Չնայած սկզբում դրանք գնահատվել են 200 հազար ԱՄՆ դոլար, սակայն աճուրդը գերազանցել է բոլոր սպասելիքները. արդյունքում այն վաճառվել է 2,6 մլն դոլարով: Աճուրդի արդյունքից անասելի գոհ են մնացել թե՛ զարդը վաճառողը և թե՛ դրա գնորդը: