«Հրապարակ». Սամվել Ֆարմանյանը փափուկ բարձ է դրել Արցախյան ազատամարտիկի գլխի տակ

Ավետիս Խաչատրյանն ավելի շատ հայտնի է «Գիժ Ավո» մականունով: «Վիտյա Այվազյան» ջոկատի հրամանատարն է եղել, Արցախյան ազատամարտով անցած մարտիկը վեց մեդալի է արժանացել, իսկ վերջինը ստացել է Հայոց բանակի կազմավորման 20-ամյակի առիթով: Այն կռված տղաներից է, ովքեր այս տարիների ընթացքում փող ու պաշտոն չեն ունեցել, փոխարենը բնակարանն է գրավ դրել բանկում: Բանկն էլ վաճառել է, իր գումարը վերցրել, իսկ Ավետիսի ընտանիքը զրկվել է բնակարանից, ինչպես ինքն է ասում՝ վարձով է ապրում իր տանը: Թաղապետարանը շենքի բակում 18 քմ տարածք է վարձակալության հիմունքներով տրամադրել Ավետիսին: Նա էլ այդ տարածքը գերազանցող ծավալով շինություն է կառուցում, որի մի մասը հավանաբար խանութ կլինի, մի մասում էլ տանիքից զրկված 7 հոգուց բաղկացած ընտանիքը կապաստանի: Իսկ դա դուր չի եկել քաղաքապետարանին, և քանդելու հրաման է արձակել: Ավետիսին ոչ պաշտպանության նախարարությունն է օգնում, ոչ հրամանատար լինելը, ոչ էլ մեդալները, էլ չեմ ասում պատերազմից մնացած սպիները, որ մի տեղ հնարավորություն տան ընտանիքի համար ապաստան ստեղծի: Երկրապահ ընկերներն են փորձել Ավետիսին օգնել, հավաքվել և գնացել են Նոր Նորքի ՀՀԿ-ի նախընտրական շտաբ, հանդիպել ընտրատարածքի պատգամավորի հանրապետական թեկնածու Սամվել Ֆարմանյանին, վերջինս էլ հուսադրել է, թե թող հիմա քանդեն, իսկ ընտրություններից հետո ինքն ամեն ինչ կանի, որ նորից կառուցվի: Այդ աղոտ հույսն էլ Ավետիսի ընտանիքի սրտում՝ գիշերվա քողի տակ նայում էին, թե ինչպես են քանդում նոր շարված պատերը:

Այդ փափուկ բարձի ժամկետը, որ պարոն Ֆարմանյանը դրեց Ավետիսի գլխի տակ, արդյո՞ք մինչև մայիսի 6-ը չէ: