«Հայկական Ժամանակ». Երեկ հայ զինծառայողները ինքնապաշտպանվելու հնարավորություն չեն ունեցել

Երեկ գիշեր մի քանի հոգուց բաղկացած ադրբեջանական դիվերսիոն խումբը հատել է հայ ադրբեջանական սահմանը և շուրջ 150 մետր խորացել Հայաստանի տարածք, Այգեպար-Մովսես գյուղերի միջև ընկած սահմանամերձ ճանապարհահատվածում նռնակ նետել ու կրակահերեր ուղղել ՀՀ ՊՆ զինծառայողներին Բերդ քաղաքից դիրքեր տեղափոխող մեքենայի վրա, ինչի հետևանքով սպանվել է երեք հայ զինծառայող: Երեկվա դրությամբ ՀՀ ՊՆ-ն ձեռնպահ էր մնացել տեղի ունեցածը դիվերսիա անվանելուց, պաշտոնական հաղորդագրության մեջ սահմանափակվել էր խիստ արձանագրային տեքստով:

Թերթի ունեցած տեղեկություններով, հայ զինծառայողները ինքնապաշտպանվելու հնարավորություն չեն ունեցել, քանի որ նրանց մոտ զենք չի եղել, իսկ թե ինչու՞, դեռևս հայտնի չէ: Այդ դեպքի և վերջին օրերի ընթացքում ադրբեջանական կողմի ակտիվացման վերաբերյալ Սերժ Սարգսյանը երեկ Լոռիում՝ Ստեփանավանում տեղի ունեցած նախընտրական հանդիպման ժամանակ ասել է. «Չեմ կարծում, թե որևէ մեկը մեր երկրում դեռևս կասկածում է համապատասխան արձագանքի անխուսափելիությանը: Չեմ կարծում, թե որևէ մեկը կասկածում է մեր պաշտպանական ուժերի հզորությանը: Թող ոչ ոք չկարծի, թե կարող է օգտվել մեր երկրում տեղի ունեցող գործընթացներից կամ մտածի, որ ընտրություններ են՝ գլուխները խառը կլինեն»:

Թերթը նշում է, որ նախօրեին Սերժ Սարգսյանը նախընտրական հանդիպումներ էր ունեցել Տավուշի մի շարք բնակավայրերում, այդ թվում և Բերդում: Դիվերսիոն հարձակումը տեղի է ունեցել Սերժ Սարգսյանի հեռանալուց ժամեր անց: