ԵԱՀԿ-ի արած հայտարարությունն անատամ է. քաղաքագետ

Ռազմական տեսանկյունից Ադրբեջանի երեկվա գործողությունները ոչ մի էական նշանակություն չունեն: Այս մասին այսօր լրագրողների հետ հանդիպման ժամանակ հայտարարեց քաղաքագետ Նարեկ Գալստյանը:

«Ոչ դիրքային առաջխաղացում է եղել, ոչ ենթակառուցվածի ոչնչացում և այլն: Ռազմահոգեբանական տեսանկյունից միգուցե կարծում էին՝ կարող է սա բարոյալքել մարդկանց»,- նշեց քաղաքագետը:

Հիշեցնենք, որ երեկ Տավուշի մարզի Այգեպար-Մովսես գյուղերի միջեւ ընկած ճանապարհահատվածում հրազենային մարմնական վնասվածքներ են ստացել եւ մահացել երեք հայ զինծառայող:

Անդրադառնալով նախագահ Սերժ Սարգսյանի երեկ արած հայտարարությանը, թե Ադրբեջանը արժանի պատասխան է ստանալու, Նարեկ Գալստյանը նշեց, որ այն բարձր է գնահատում և Սերժ Սարգսյանը զուսպ ու կոնկրետ արձագանքեց այդ իրավիճակին: Ինչ վերաբերում է միջազգային հանրությանը, քաղաքագետի կարծիքով այն էական դերակատարում այս խնդրում չունի:

«Միջազգային հանրության հայտարարություները մեղմ են, ԵԱՀԿ-ի արած հայտարարությունն անատամ է: Ընդամենը կոչ հարգել ձեռք բերված պայմանավորվածությունները, ինչն Ադրբեջանի մոտ չի ստացվում: Չկա միջազգային մեխանիզմ, որի միջոցով կարելի կլինի կանխել նման ոտնձգությունները: Միջազգային հանրության մեղմ դիրքորոշումը պայմանավորված է համարժեք պատասխան տալու անկարողությամբ ու անկարելիությամբ: Այն արմատական միջոցառումներ դժվար կիրառի, քանի որ դա էներգետիկ նախագծերի հարցում լուրջ խոչընդոտների պատճառ կարող է դառնալ»,- կարծիք հայտնեց քաղաքագետը՝ հավելելով, որ միայն հայկական ուժերը պետք է համարժեք արձագանք տան: