Հայաստանում 53%-ը չի հավատում ազատ, թափանցիկ և արդար ընտրությունների անցկացմանը.«The Gallup Organization»-ի ներկյացուցիչ

«Հայաստանում հարցվածների 53%-ը չի հավատում ազատ, թափանցիկ և արդար ընտրությունների անցկացմանը», - այս մասին այսօր լրագրողների հետ հանդիպման ժամանակ ասաց «The Gallup Organization»-ի ներկյացուցիչ Ռասա Ալիշաուսկենեն՝ հավելելով, որ հարցումն անցկացվել է ապրիլի 16 – 22-ը՝ Հայաստանի ողջ տարածքում, 1015 չափահասների շրջանում: Վերջինս նշեց նաև, որ հարցման առաջին փուլի տվյալների համեմատ՝ ընտրությունների արդարությանը չհավատացողների թիվը նվազել է 3%-ով:

«Հարցվածների 38%-ը վստահություն է հայտնել, որ կլինեն ազատ եւ արդար ընտրություններ, 66%-ը նշել է, որ անպայման կմասնակցեն քվեարկությանը, 23%-ը հայտարարել է, որ ամենայն հավանականությամբ կմասնակցի քվեարկությանը, մնացած մասը դեռ չի կողմնորոշվել այդ հարցում», - նշեց Ռասա Ալիշաուսկենեն: Նրա խոսքերով հարցվածների շարքում ազատ և արդար ընտրություններին հավատացողների մեծ մասը պատրաստ է իր ձայնը տալ իշխող ՀՀԿ-ին եւ ԲՀԿ-ին:

«Հարցումները ցույց են տվել, որ կուսակցությունների եւ քարոզարշավի մասին տեղեկատվությունը հարցվածների 93%-ն ստանում է հեռուստատեսությունից, 28%-ը՝ ռադիոյից, 33%-ը՝ ընկերներից ու ծանոթներից, 30%-ը՝ համացանցից, 22%-ը՝ թերթերից, 6%-ը՝ քաղաքական գործիչների հետ հանդիպումներից և 8%-ը՝ նախընտրական պաստառներից և տրանսպորտում փակցված թերթիկներից», - ասաց «The Gallup Organization»-ի ներկյացուցիչը: