Նազարբաևի անվան փողոցն ու իշխանությունների արժանապատվությունը

Ղազախստանի «սուլթան» Նորսուլթան Նազարբաևն արդեն առաջին անգամը չէ, որ աչքի է ընկնում իր թուրքա-ադրբեջանամետ կեցվածքով: Բոլորս էլ հիշում ենք, թե ինչպես Նազարբաևը ՀՀ նախագահին տհաճ անակնկալ մատուցեց՝ խոսելով Ալիևի անունից և ակնհայտորեն պաշտպանելով Ադրբեջանի շահերը: Օրեր առաջ էլ նույն Նազարբաևը խոսելով ռուս-թուրքական հակամարտության մասին՝ հավասարության նշան դրեց կողմերի միջև՝ չընդունելով Թուրքիայի ակնհայտ մեղավորությունը: Այսինքն՝ ամեն դեպքում, այս մարդու «թուրքասիրությունն» ապացույցներ չի պահանջում, և եթե մենք պաշտոնական մակարդակով էլ չենք կարող Նորսուլթանին իր «տեղը ցույց տալ», ապա կարծում եմ՝ գոնե կարող ենք մեր երկրում նրան անունով փողոց չունենալ: Իսկ այդպիսի փողոց կա. ինչպես պարզվեց օրեր առաջ լրատվամիջոցների կողմից տարածվող տեսանյութում՝ Շիրակի մարզի Հառիճ գյուղի կենտրոնական փողոցը կոչվում է հենց Նազարբաևի անունով:

Թե ինչ հիմնավորումներ են բերում համայնքի ղեկավարները՝ ամենևին էլ կարևոր չէ: Կարևորն այն է, որ մենք մեր երկրում հակահայ գործչի անունով փողոց կամ որևէ այլ բան չպետք է ունենայինք, դա ուղղակի ազգային արժանապատվության հարց է: Հուսով եմ՝ պատկան մարմինները, ելնելով նույն ազգային արժանապատվությունից, անուշադրության չեն մատնի առաջին հայացքից միգուցե մանրուք թվացող այս հարցը:

Կարեն Վարդանյան