Դավութօղլուի ցինիզմը և մեր ԱԳՆ-ի «լռությունը»

Թուրքիայի իշխանությունների անսահման ցինիզմն արդեն վաղուց զարմանք չի հարուցում: Գրեթե ամեն օր էլ կարելի է ակնկալել, որ Էրդողանը կամ Դավութօղլուն հերթական հիմար ու ցինիկ հայտարարությունը կանեն, և վերջիններս էլ այդ հարցում երկար սպասեցնել չեն տալիս: Հերթական ցինիկ հայտարությունը Դավութօղլուն հնչեցրել է Բաքվում՝ Ադրբեջան կատարած այցի շրջանակներում: Թուրքիայի վարչապետը կոչ է արել Հայաստանին՝ դուրս գալ «իրենց չպատկանող հողերից», վերադրաձնել դրանք Ադրբեջանին, և միայն այդ ժամանակ խաղաղության գործընթաց սկսելու դեպքում Հայաստանը կկարողանա մասնակցել «Թուրքիայի, Վրաստանի ու Ադրբեջանի միջև ձևավորված խաղաղ և հեռանկարային միությանը»:

Պատկերացնում ե՞ք՝ ինչպիսի «մեծահոգություն» է ցուցաբերում Հայաստանի հանդեպ Թուրքիայի վարչապետը, հնարավորություն է տալիս մեր իսկ կամքով վերադրաձնել իր բնորոշմամբ՝ «Ադրչբեջանի սուրբ հողերը»: Այս հայտարարությունը բացի այն, որ կարելի է տեղավորել հումորային ժանրի մեջ, մյուս կողմից նաև խիստ հեգնական է, ցինիզմի բացարձակ դրևորում է և տրամաբանորեն այն պատասխան է պահանջում: Իսկ պատասխանը կարծես թե չկա, համենայն դեպս մինչև աշխատանքային օրվա ավարտը մեր ԱԳՆ-ն պահպանեց իր ավանդական «լռությունը»: Չէ, մեր նախարարն, իհարկե, այսօր խոսել է, բայց ուրիշ թեմայով, նա Բելգրադում այսօր գնահատական է հնչեցրել այս գիշեր սահմանին Ադրբեջանի կատարած դիվերսիայի փորձի վերաբերյալ, բայց Թուրքիայի վարչապետի կոչի մասին՝ ոչ մի խոսք: Հետաքրքիր է՝ ինչու՞, նրա համար, որ Թուրքիան ավելի փոքր ու աննշան պետությու՞ն է, թե՞ միգուցե հակառակը: Իհարկե, չեմ բացառում, որ արձագանքը դեռ կարող է լինել, սակայն ուշացած արձագանքները ամեն դեպքում ավելի քիչ էֆեկտիվ են:

Մնում է հուսալ, որ մեր ԱԳՆ-ն աֆրիկյան պետությունների հետ հարաբերությունները սերտացնելուց զատ նաև ավելի ուշադիր կլինի մեր անմիջական՝ ոչ բարով հարևանների նկատմամբ և ի վերջո կորդեգրի արձագանքելու կամ ժամանակին արձագանքելու գործելաոճը:

Կարեն Վարդանյան