Մարդիկ համոզված են, որ խնդիրները կարող է լուծել ՀՀԿ-ն. Սերժ Սարգսյան

«Ընտրարշավը մտնում է ավարտական փուլ և ինձ համար ավելի հստակ է թե՛ մեր ծրագրերի նկատմամբ մարդկանց հետաքրքրությունը, թե՛ ընտրողների ցանկություններն ու մտահոգությունները»,- Դավիթաշենի ընտրողների հետ հանդիպման ժամանակ հայտարարեց ՀՀԿ և հանրապետության նախագահ Սերժ Սարգսյանը:

«Այս ընթացքում ևս մեկ անգամ համոզվեցի, որ մեր և՛ արտաքին, և՛ ներքին քաղաքական ուղեգծերը ճիշտ են: Ամենուրեք ակնհայտ է փոփոխությունների ակնկալիքը, նաև ակնհայտ է, որ փոփոխությունների իրականցումը ժողովուրդը կապում է կարող ուժի հետ: Հանդիպումների ընթացքում շատ մարդիկ համոզված են, որ խնդիրները կարող է լուծել ՀՀԿ-ն և պարզ ասում են, որ չեն հավատում այն մարդկանց, ովքեր գալիս և խոստանում են, որ եթե իրենց քվեարկեն մեկ շաբաթում կամ մեկ ամսում մեր երկիրը կդարձնեն դրախտավայր»,- հայտարարեց Սարգսյանը:

Այնուհետև նախագահը հակիրճ ներկայացրեց ՀՀԿ-ի նախընտրական ծրագերի առողջապահությանն ու կրթությանը վերաբերող դրույթները: Մասնավորապես, առողջապահության ոլորտում փոփոխությունն ուղղված է լինելու հիվանդությունների կանխարգելմանը, բժիշկների պարտադիր վերապատրաստմանը, վերազինելու են բոլոր առողջապահական հիմնարկները, կառուցելու են եվրոպական չափանիշներին համապատասխանող արյունաբանական և ուռուցքաբանական կենտրոններ և այլն:

Խոսելով կրթության մասին՝ Սարգսյանը նշեց, որ ֆինանսական մեծ օժանդակություն են ցույց տալիս աշխարհի քսան առաջատար բուհերում սովորող հայ երիտասարդներին, պետբյուջեից ավելացնելու են գիտակրթական ծրագրերի ու թեմաների ֆինանսավորումը, բարեկարգելու են բոլոր ուսումնական հաստատությունները:

«Ամոթ է, բայց դպրոցներ ունենք, որ չեն ջեռուցվում: Այս տարի ունենալու ենք ամբողջովին բարեկարգ ուսհաստատություններ: Դպրոցներում ապահովելու ենք ինտերնետի ամբողջական ծածկույթ»,- ասաց Սարգսյանը՝ հավելելով, որ աջակցելու են գիտության և արտադրության կապերի ամրապնդմանը: