Գվատեմալայի նախագահը որոշել է ապրել աղքատների միջավայրում՝ «մարդկանց ավելի մոտ լինելու համար»

Գվատեմալայի նախագահ Օտտո Պերես Մոլինան որոշել է մի քանի օր ապրել երկրի արևմուտքում գտնվող Ուիտան քաղաքի աղքատ թաղամասերից մեկում՝ «մարդկանց ավելի մոտ լինելու» և հասկանալու համար՝ ինչպես են ապրում հասարակ գվատեմալացիները։ Այս մասին ապրիլի 28-ին հաղորդել է Univision հեռուստաալիքը։

Երեկ և այսօր Պերես Մոլինան անցկացնում է մի աղքատ ընտանիքի հետ, որում ապրող երեխան տառապում է խրոնիկ թերսնուցումից։ «Ժողովրդի մեջ» են ապրում նաև երկրի վարչապետն ու մի շարք պաշտոնյաներ, որոնք հաստատվել են նմանատիպ ընտանիքների բնակարաններում։

Գվատեմալայի իշխանությունների նման վարքագիծը պայմանավորված է «Մենք բոլորս էլ կարող ենք ինչ–որ բան տալ» հատուկ ծրագրով։ Դրանում ներգրավված են 5 հազար կամավորներ, որոնք օգնում են աղքատ ընտանիքներին։

Վերջերս անցկացված սոցհարցումների արդյունքում պարզ է դարձել, որ այս ծրագրի իրականացման հետ զուգընթաց աճել է երկրի նախագահի վարկանիշը և երկրի բնակչության շուրջ 76 տոկոսը դրական է գնահատել Մոլինայի գործունեությունը՝ երկրի նախագահի պաշտոնում լինելու ընթացքում։

Նշենք նաև, որ Գվատեմալայի ներքին խնդիրներից ամենակարևոր 2–ը աղքատությունն ու հանցավորության բարձր ցուցանիշն է։ Պաշտոնական տվյալներով՝ այս ոչ այդքան մեծ երկրում միջինը օրեկան կատարվում է 16 սպանություն։