Եթե մենք չունենք նավթ և գազ, ուրեմն մեր հիմնական հարստությունը պետք է լինի մարդը, մարդկային տաղանդը. Սերժ Սարգսյան

Այսօր Հայաստանի Հանրապետական կուսակցությունը նախընտրական քարոզարշավ անցկացրեց Մարալիկում։ Ընտրողների հետ հանդիպման ժամանակ ՀՀԿ առաջնորդ Սերժ Սարգսյանը նշեց, որ Հայաստանը ներմուծող երկրից պետք է դառնա արտահանող երկիր:

ՀՀԿ առաջնորդը նշեց, որ Հայաստանում չկա մի ոլորտ, որը չի զգում փոփոխությունների կարիք և հավելեց, որ տնտեսական աճից իրենք հասնում են նրան, որ այդ հաջողությունները շոշափելի լինեն յուրաքանչյուր քաղաքացու համար։ Սարգսյանը նշեց նաև, որ այսօր գերակա խնդիրը արտադրական հզորություններն ավելացնելն է, որպեսզի յուրաքանչյուր քաղաքացի կարողանա արժանապատվությամբ վաստակել իր և իր ընտանիքի համար անհրաժեշտ միջոցները: Դրա համար էլ իրենք, խրախուսելով ձեռներեցությունը, ներգրավում են նոր տեխնոլոգիաներ:

Սարգսյանն անդրադարձավ նաև տեղական արտադրության զարգացմանը և նշեց, որ տեղական զարգացման հետ միասին երկրում փորձ է արվում ներմուծումը փոխարինող նոր տեսակի արտադրություններ ստեղծել։

«Ներկրող տնտեսությունից պետք է վերափոխվենք արտահանող տնտեսության»,–ասաց Սարգսյանը և հավելեց, որ եթե մենք չունենք նավթ և գազ, ուրեմն մեր հիմնական հարստությունը պետք է լինի մարդը, մարդկային տաղանդը:

ՀՀԿ առաջնորդը, անդրադառնալով հայ-թուրքական հարաբերություններին և հայ-թուրքական արձանագրություններին, ասաց.

«Մենք դատապարտում ենք պատմական փաստերը վիճարկելու միջոցով Հայոց ցեղասպանությունը հարաբերական դարձնելու բոլոր փորձերը»՝ հավելելով, որ իրենք շարունակում են պահանջել արդարություն և հատուցում:

«Թուրքիան որևէ անելիք չունի Արցախի հարցում և մենք պահանջել ենք, որ ստորագրի այդ փաստաթղթի տակ»,- ասաց Սարգսյանը:

ՀՀԿ ղեկավարը, խոսելով անցած հինգ տարիներին ՀՀԿ–ի կատարած աշխատանքներին, նշեց, որ իրենք ունեցել են բացթողումներ, սակայն տեր են եղել դրանց, ինչպես նաև տեր են եղել ձեռքբերումներին: Ըստ Սարգսյանի՝ Հայաստանում գրեթե չկա մի համայնք, որտեղ ՀՀԿ–ն բարեփոխումներ կատարած չլինի։

«ՀՀԿ-ն ավելին ունի անելու, քանի որ ամենահզորն է իր փորձով և ժողովրդականությամբ», -ասաց ՀՀԿ նախագահը՝ ներկաներին հորդորելով շարունակել պայքարը հանուն ավելի լավ Հայաստանի։

Սերժ Սարգսյանը մարալիկցիներին կոչ արեց մայիսի 6-ին քվեարկել ՀՀԿ–ի և Մարալիկում թիվ 36 ընտրատարածքում մեծամասնական ընտրակարգով առաջադրված ՀՀԿ–ական Մխիթար Վարագյանի օգտին: