Մեծ Բրիտանիայի ամենահարուստ մարդկանց եռյակում անգլիացի չկա. The Sunday Times

Բրիտանական The Sunday Times պարբերականը հրապարակել է Մեծ Բրիտանիայի ամենահարուստ մարդկանց ցուցակը, ըստ որի ընդհանուր գումարը նախորդ տարվա համեմատ աճել է՝ հակառակ ֆինանսատնտեսական ճգնաժամի նոր փուլի աճող վտանգին։

Համաձայն ուսումնասիրության՝ Մեծ Բրիտանիայի ամենահարուստ մարդկանց ընդհանուր կարողությունը 2012–ի գարնանը հասել է 414 միլիարդ  ֆունտ ստեռլինգի (673.5 միլիարդ ԱՄՆ դոլար), ինչը 4,7%-ով ավելի է նախորդ տարվա համեմատ։ Այս ցուցանիշն առաջին անգամ է  գերազանցել 2008–ի նախաճգնաժամային իրավիճակը։ Ռոման Աբրամովիչն ու Ալիշեր Ուսմանովը պահպանել են իրենց դիրքերը Մեծ Բրիտանիայի 77 միլիարդատերերից բաղկացած ցուցակի առաջին եռյակում։

Մեծ Բրիտանիայի ամենահարուստ մարդկանց ցուցակում ութերորդ տարին անընդմեջ զբաղեցնում է մետաղի արդյունահանման հնդիկ մագնատ Լակշիմ Միտալը, որի կարողությունը գնահատվել է 12.7 միլիարդ ֆունտ ստեռլինգ։

Միտալը վարկանիշային աղյուսակում պահպանում է իր դիրքերը, թեև վերջին 12 ամիսների ընթացքում 27%-ով նվազել է նրա ընտանիքի կապիտալը՝ պողպատի համաշխարհային շուկայի գների նվազման հետ կապված։

Երկրորդ տեղը զբաղեցնում է «Մետալոինվեստ»՝ մետաղի արդյունահանությամբ զբաղվող և «Արսենալ» ֆուտբոլային ակումբի բաժնետեր Ալիշեր Ուսմանովը, որի կարողությունը գնահատվել է 12.3 միլիարդ ֆունտ ստեռլինգ։

Bloomberg–ն Ուսմանովին ճանաչել էր 2012–ի ամենահարուստ մարդը Ռուսաստանում։

Նավթային մագնատ և «Չելսի» ֆուտբոլային ակումբի սեփականատեր Ռոման Աբրամովիչը՝ 9.5 միլիարդ ֆունտ ստեռլինգով զբաղեցրել է երրորդ տեղը, թեև 2011–ին նրա կարողությունը 800 միլիոն ֆունտ ստեռլինգով նվազել է։