Կուսակցությունն ինքն է իր ընտրողներին ուղղորդում դեպի քրեորեն պատժելի գործողությունները. Վարդան Օսկանյան

«Ամբողջությամբ անհիմն են մեղադրանքները շտաբի նկատմամբ», - Հայկական երկրորդ հեռուստաալիքով հեռարձակվող «Խոսքի իրավունք» հաղորդման ժամանակ ասաց նախկին արտգործնախարար, ԲՀԿ-ական Վարդան Օսկանյանը: Վերջինիս համոզմամբ այսօր ավելի կարևոր խնդիր, քան ազատ, արդար ընտրությունների անցկացումը, իսկապես չկա։ «Այս տարիները, եթե մենք կորցրեցինք, ժողովուրդն իսկապես հիասթափության մեջ կլինի և անհնար կլինի այս բոլորը վերականգնել: Իսկապես հույս կա. այս անգամ տեսնում ենք, որ մարդիկ լուրջ են, ուզում են տեր կանգնել յուրաքանչյուր ձայնի: Մենք այդ ընդհանուր շտաբը կազմել ենք, որովհետև դրա անհրաժեշտությունը կար, դա օրվա հրամայականն էր և ես հույս ունեմ, որ իսկապես կկարողանանք արդյունավետ աշխատել: Մենք ամեն ինչ անելու ենք, որպեսզի ազատ և արդար ընտրություններ անցկացվեն:

Փաստեր կան, որ ընտրացուցակներում կան սխալներ: Ուսումնասիրությունների արդյունքում ստացած փաստեր են, բոլոր շեղումները, աղավաղումները հայտնաբերվել են և իսկապես ցուցակը խայտառակ վիճակի մեջ է և դրանով ընտրության գնալն արդեն հավասար է ասելու, որ հնարավոր չի ընտրությունների արդյունքերին վստահել, դրա համար էլ, որպես դրա լուծում, շտաբում որոշում կայացվեց, որ մենք մտնենք Սահմանադրական դատարան և գոնե պահանջենք, որ Սահմանադրական դատարանը պահանջի իշխանություններից, որ մայիսի 6-ին քվեարկողների ցուցակը հրապարակվի: Այստեղ գաղտնիության խնդիր չկա, ոչ ոք չգիտի մարդիկ ինչ են քվեարկել, խոսքը դրա մասին չէ,  խոսքը գնում է նրա մասին, թե ովքեր են մասնակցել ընտրություններին, որը բաց է, բայց այդ ցուցակը, որը մենք գոնե ունենանք, մենք իսկապես կկարողանանք կողմնորոշվել, թե կեղծիքի չափն ինչ է եղել, քաղաքում չգտնվողները քվեարկել են, թե ոչ, մահացածները քվեարկել են, թե չէ, ցուցակներում նպատակային աղավաղված անունների քվեարկություն եղել է, թե ոչ: Բայց ամենաշահարկվող խախտումը ցուցակներում, այն է, որ մի բառի փոփոխությամբ, նույն մարդու անունը կրկնվում է և դրանք տասնյակ հազարներ են, եթե մի քանի հազար լիներ՝ ձայն չէինք հանի, բայց տասնյակ հազարներ, հարյուրներ: Եվ մենք հույս ունենք, որ ՍԴ-ն ողջամիտ որոշում կկայացնի և այդ ցուցակները կհրապարակվեն, որից հետո շատ ավելի պարզ կդառնա», - նշեց Վարդան Օսկանյանը՝ հավելելով, որ շատ բան կախված է նաև ժողովրդից, ժողովուրդը պետք է համագործակցի:

«Ես մեր ժողովրդին ասելու եմ հետևյալը. եթե քաղաքական ուժերը կփորձեն ինչ–որ կերպ ուղղորդել, հետևյալը ունեցեք՝ կրկնակի քվեարկությունը մեր օրենքով քրեորեն պատժելի է՝ 5-7 տարվա ազատազրկմամբ: Այսինքն, եթե մի կուսակցություն գալիս է և իր ընտրողին ավտոբուսով բերում է մի տեղ, հետո նույն ավտոբուսով տանում է երկրորդ տեղը՝ նորից ընտրելու, այդ ընտրողները կարող են քրեականորեն  պատժվել, 5-7 տարի ազատազրկվեն: Առավել ևս, որ այդ կուսակցությունը պետք է պատասխանատվություն զգա, որ ինքն իր ընտրողներին, փաստորեն, ուղղորդում է դեպի քրեորեն պատժելի գործողությունները», - նշեց նախկին արտգործնախարարը: