Դուք էդ հաղթանակը ծախեցիք, որ ձեր համար ջիփեր առնեք. Նիկոլ Փաշինյան

Երեկ՝ նոյեմբերյանցիների հետ հանդիպմանը, ՀԱԿ անդամ Նիկոլ Փաշինյանը վստահեցրել է, որ մայիսի 6-ին Հայաստանում տեղի է ունենալու 30 վայրկյանանոց փոթորիկ, որը քշելու է սերժական, քոչարյանական հանցագործ իշխանությունը, և հավելել, որ նախընտրական քարոզչության ընթացքում առաջին հայացքից թվացող հանդարտությունը խաբուսիկ է։

Նիկոլ Փաշինյանը նշել է, որ հեղափոխության համար պարտադիր չէ, որ մարդիկ փողոց ու հրապարակ դուրս գան։

«Այս հեղափոխության հարթակը քվեախցիկն է լինելու»,-ասել է Փաշինյանը։

ՀԱԿ ներկայացուցիչը նշել է, որ իշխանափոխությունն անխուսափելի է, և հավելել, որ դա վկայում է իշխանությունների վարած քաղաքականությունը, նրանց վերջ չունեցող թալանը:

Ըստ Փաշինյանի իշխանությունները հայաստանցիներից բացի նյութական ունեցվածքից, թալանում են նաև նրանց պատմությունը, 90-ականների հերոսական պայքարի տարիները ներկայացնելով սև գույներով։

«Դուք էդ հաղթանակը ծախեցիք, որ ձեր համար ջիփեր առնեք»,- ասաց Նիկոլ Փաշինյանը:

Նշենք նաև, որ Հայ Ազգային Կոգնրեսը երեկ նախընտրական այց է կատարել Լոռու մարզ, եղել Նոյեմբերյանում, Ալավերդիում, Վանաձորում: ՀԱԿ քարոզարշավին առողջական խնդիրների պատճառով չէր մասնակցում Հայ ազգային կոնգրեսի առաջնորդ Լևոն Տեր-Պետրոսյանը:

Ավելացնենք նաև, որ այսօր լրագրողների հետ հանդիպմանը ՀՀՇ ղեկավար, ՀԱԿ անդամ, թիվ 4 ընտրատարածքում առաջադրված Արամ Մանուկյանը ասել է.

«Որևէ վտանգավոր բան չկա, ճնշման տատանումներ են եղել, այժմ Լևոն Տեր-Պետրոսյանը բժիշկների վերահսկողության տակ է»: