Լիբանանում 2012 թ. մանկական նկարչական միջազգային բիենալեին կմասնակցեն նաև հայ մանուկները

ՀՀ մշակույթի նախարար Հասմիկ Պողոսյանն ընդունել է Լիբանանում ՀՀ դեսպանության խորհրդատու Միրեյ Խանամիրյանին և Հայաստանի Հանրապետության անկախության 20-ամյակի առթիվ, ինչպես նաև հայ մշակույթի զարգացման և հանրահռչակման գործում ունեցած զգալի ավանդի համար պարգևատրել Հայաստանի Հանրապետության մշակույթի նախարարության բարձրագույն պարգևով` Ոսկե մեդալով:

Հանդիպման ընթացքում ՀՀ մշակույթի նախարարը և Միրեյ Խանամիրյանը քննարկել են Լիբանանում 2012 թ. փետրվարին անցկացվելիք մանկական նկարչական միջազգային բիենալեին հայ մանուկների /Գյումրու «Թռչունյան տան», «Ժան և Ալբեր Պողոսյաններ» արվեստի դպրոցի, Հայ Առաքելական եկեղեցու «Նորք» մանկական ակադեմիայի, Իրավախախտում կատարած անչափահասների հատուկ ստեղծագործական կենտրոնի սաների շուրջ 50 աշխատանքներ/ ներկայացվածության հարցը: Միրեյ Խանամիրյանի տեղեկացմամբ նկարները մնալու են Լիբանանում՝ մանկական ցուցասրահի ստեղծման համար: Անդրադարձել են Բուստանի միջազգային ամենամյա փառատոնին /օպերա, ջազ, դասական կատարումներ/ հայաստանյան արտիստների, համույթների, կազմակերպությունների մասնակցության հարցը: Փառատոնը /դասական համերգաշար/ Բուստանում անցկացվում է ամեն տարի փետրվար-մարտ ամիսներին և մասնակցում են աշխարհի տարբեր երկրների լավագույն կատարողներ: Հանդիպման ընթացքում քննարկվել են նաև հրատարակչական խնդիրներ: Երևանը գրքի 2012 թ. համաշխարհային մայրաքաղաք ծրագրի շրջանակում հայ գրատպությունը պատշաճ և լիարժեք ներկայացնելու նպատակով ՀԱԳ-ում բացված հայագիտական գրադարանին կհանձնվի մի շարք այլալեզու, հայալեզու գիտական, պատմական, գեղարվեստական, թարգմանական գրականություն, որը Միրեյ Խանամիրյանն իր հետ բերել և հանդիպմանը ներկայացրել է նախարար Հասմիկ Պողոսյանին՝ այդ թվում Լիբանանում բնակվող և ստեղծագործող Նինա Չիթեջյանի, Լևոն Նորդիկյանի, Րաֆֆի Ջերջյանի աշխատությունները։