«Հայկական Ժամանակ». Հայաստանից մեկնածների թիվը ժամանողներից ավել է 28 հազար 100-ով, թե՞ 31 հազար 200–ով

Այս տարվա հունվար-մարտ ամիսներին բոլոր տեսակի տրանսպորտներով Հայաստանից մեկնածների թիվը ժամանողներից ավելի է 28 հազար 100-ով: Այս տվյալը հրապարակել է ՀՀ տարածքային կառավարման նախարարության միգրացիոն ծառայությունը:

Անցած տարվա նույն ժամանակահատվածում մեկնողների թիվը ժամանողներից ավելի է եղել 20 հազար 400-ով: Այսինքն, այս տարի մեկնող-ժամանողների տարբերության բացասական հաշվեկշիռն աճել է 7 հազար 700 մարդով: Պաշտոնական վիճակագրության այս թվերով ստացվում է, որ 2012-ի առաջին երեք ամիսներին, նախորդ տարվա նույն ժամանակահատվածի համեմատ, 38 տոկոսով ավելի մարդ է մեկնել և չի վերադարձել:

Իհարկե, այս տարվա առաջին եռամսյակի մեկնում-ժամանումների վերը բերված 28 հազար 100 թվին չի կարելի վերապահումով չմոտենալ, քանի որ դրա ստացման հետ կապված որոշ հարցեր են ծագում: Բանն այն է, որ պաշտոնական վիճակագրությամբ՝ միայն այս տարվա մարտին բոլոր տեսակի տրանսպորտային միջոցներով Հայաստանից մեկնողների թիվը ժամանողներից ավելի է եղել 13 հազար 700-ով: Այս տարվա հունվար-փետրվար ամիսներին մեկնողների թիվը ժամանողներից ավելի էր 17 հազար 500-ով: Թվում է, թե այս երկու թվերի հանրագումարը պետք է կազմեր 31 հազար 200: Բայց ՀՀ տարածքային կառավարման նախարարության միգրացիոն ծառայության հրապարակած վիճակագրությամբ՝ այդ երկու թվերի հանրագումարը կազմել է 28 հազար 100: Իսկ թե ինչպե՞ս են այդ թիվը ստացել, միայն այդ կառույցի մասնագետներին է հայտնի: